Pagmatngon kanunay

Tungod kay nagsingabot na ang pasko, daghang panimalay ang gisugdan na pagbutang og mga dayan-dayan sama sa series lights nga migamit og kuryente.

Pahimuslan namo sa kabomberohan ang paghatag og pasidaan sa katawhan aron malikayan nato ang mga sunog mugna sa dili tukma nga paggamit sa mga dayan-dayan sa pasko.

Maayo unta og inyo kini nga hatagan og pagtagad.

1.) Ayaw pagpataka og palit og mga series lights kay mao kini ang sagad hinungdan sa sunog. Dili unta kamo magpahaylo sa mga baligya nga barato diha sa aseras apan wala kita makasiguro sa kalidad. Labing maayo og adto kita palit sa mga ilado nga baligyaanan.

2.) Kadtong mobiya sa ilang panimalay aron mosuroy, kinahanglan nga i-switch-off ninyo ang tanang electrically-lighted Christmas decors sama sa series lights, lanterns ug uban pa nga mga dayan-dayan  nga migamit og kuryente. Pagnga ‘sab sa dayon ninyo’ng katulog.

3.) Pwerte’ng taasa sa bakasyon karon. Lagmit pahimuslan kini sa pipila aron mobiyahe sa ilang tagsa-tagsa ka probinsya aron adto mamasko. Kun mobiya na kamo, isiguro nga ang tanang appliances naibot na gikan sa outlet. Mas maayo nga i-off g’yud ang plangka kun taastaas ang bakasyon ug isirado usab ang LPG tank valve.

4.) Nabatasan na nato’ng mga Pinoy ang pagpabuto busa adto kini himoa sa lugar nga hawan ug ang mga bata bantayan kanunay. Para nako mas maayo’ng mangita na lang kita og laing paagi sa pagsaba-saba aron hingpit nga luwas sa disgrasya.

Kining mga fire safety tips mogiya unta kanato aron hingpit kita’ng luwas sa sunog ug disgrasya. Ang tiunay nga pagsaulog sa Pasko wala magdepende sa unsa  kadaghan sa imong dayan-dayan ug mga series lights nga imong gibutang sa inyong panimalay.