EDITORYAL - Mga sekretong di matago

Hinay-hinay nang nanggawas ang mga sekreto sa mga nangambisyong mamahimong sunod nga labing gamhanang tawo dinhi sa Pilipinas human sa 2016 Elections.

Ang Senate Blue Ribbon Committee adunay gihimong imbestigasyon batok sa kampo ni Bise Presidente Jejomar Binay kabahin sa Makati parking lot nga giingong gipaburot ang presyo.

Sa pagkakaron, si Binay maoy sentro sa mga pasangil ug alegasyon. Normal lang kini tungod kay usa man siya ka politiko ug dunay dakong purohang mamahimo siyang mosunod nga presidente sa nasud.

Sa nagpadayong hearing sa Senado kabahin sa imbestigasyon kang Binay, duna na say migawas nga laing isyu ug posible na usab utingkayon sa Senado batok ni Binay.

Kini mao ang P1.2 bilyones nga 350-ektaryang agricultural state nga gipasangil nga iya ni Binay nga nahimutang sa Barangay Maligaya sa Rosario, Batangas nga gitawag karon nga “Hacienda Binay.” 

Kini giyagyag sa kanhi kaalyado nga si  Makati Vice Mayor Ernesto Mercado kinsa higpit niya karong kaaway sa politika. Sama sa gipaabot, wa angkona ni Binay nga iyaha ang maong propiyedad.

Giingong katunga ang gilapdon niini sa San Juan City ug kaunomon ka pilo ang Luneta Park.

Kining mga isyuha makapaduha-duha sa mga tawo, gani makita kini sa mga resulta sa mga surveys bisan kadudahan kung independente ba g’yud  kini nga surveys.

Dako pa ang pahat sa mga botante nga “undecided”  ug sila unya maoy mamahimong yawe sa kadaugan ni bisan kinsang  kandidato.

Niining mga panahona naglihok na ang mga makinarya sa matag political parties ug duna pa unyay daghang mga sekretong manggawas nga maoy makagiya sa mga botante sa pagbotar sa 2016.