Lalawigan sa Mactan

Pagka kongresista ug di pagka mayor sa Dakbayan sa Lapu-Lapu ang gitinguha ni Cordova Mayor Adelino Sitoy sa piniliay sa 2016. Mao ni ang giangkon sa iyang anak nga si Provincial Board Member Arleigh Sitoy sa ikaunom  nga  distrito sa Sugbo. Si Sitoy, nga abogado sama sa iyang amahan, nitataw nga way balaod nga malapas kun magpa-rehistro si Mayor Sitoy isip botante sa Lapu-Lapu samtang magpabilin pagka mayor sa Cordova. Gipasabot hinuon ni Board Member Sitoy nga wa silay tinguha paghagit sa politikanhong liderato sa mga Radaza sa Opon. Ang mas dakong katuyoan sa pagbalhin ni Mayor Sitoy sa Opon mao ang pagduso sa ilang damgo paghimo sa tibuok isla sa Mactan nga buwag nga lalawigan.

* * *

Nitug-an si Board Member Sitoy sa TV Patrol Central Visayas nga hagbay rang nagkasabot ang mga Sitoy ug mga Radaza sa paghiusa sa Opon ug Cordova. Apan nahuman na lang ang iyang termino, napakyas si kanhi kongresista Arturo Radaza pagduso sa ilang damgo sa Kongreso.

Kuwang og pagtuo ang mga Sitoy nga puniton ni Kongresista Aileen Radaza ang wa mahimo sa iyang amahan. Kumbinsido sila nga si Mayor Sitoy ang naghupot sa igong katakos ug kasinatian sa pagbarug sa Kongreso, pagpasabot sa iyang kaubanang mga magbabalaod ug pagpanimon sa balaudnon nga pormal nang motukod sa bag-ong lalawigan sa Mactan.

* * *

Makabarug nang Mactan sa iyang kaugalingong mga tiil, naneguro si Board Member Sitoy. Masaligon gani siya nga mamahimo silang mas maayo nga Singapore. Matud niya may igo na silang katigayonan sa pag-atiman sa batakang mga panginahanglan sa mga molupyo, sama sa kahimsog ug edukasyon.

Gawas pa, niingon si Sitoy nga ang pagkahimong buwag nga lalawigan sa Mactan makapaluag sa nagpunsisok nang mga molupyo ug mga industriya sa mainland sa Sugbo. Matud niya kining dugay na nilang gitipigan nga pangandoy maoy nakahimong dinalian sa panginahanglan pagtukod sa ikatulong taytayan nga magsumpay sa Cordova ug Dakbayan sa Sugbo.

* * *

May gamay hinuong komplikasyon ang plano ni Mayor Sitoy pagdagan pagka kongresista sa bugtong distrito sa Lapu-Lapu: Ang mga Sitoy ug mga Radaza managsama nga mga sakop sa Liberal Party (LP), ang partido sa administrasyon ni Presidente Noynoy Aquino.

Ang naandan nga politikanhong lagda nga “equity of the incumbent” mopabor sa mga Radaza nga maoy nagtungkawo sa gahom pagka mayor ug pagka kongresista sa Lapu-Lapu. Kun mohinayon pagdagan sa Lapu-Lapu, mahimong mapugos si Mayor Sitoy paggawas sa LP ug pagpasilong og laing politikanhong partido. Sa iyang bahin, si Board Member Sitoy nipasabot nga di kinahanglang may mahitabong panagbangga kun tumanon sa mga Radaza ang ilang gikasabotan. Ambot kun sama ba kamapailubon si Mayor Sitoy, nga gihulagway nga maoy labing takos nga mopukan sa mga Radaza.