Kinsa’y mopirma alang sa menor nga heir?

Dear Atty. Divine,

Ang akong bana namatay niadtong miaging tuig. Aduna mi house and lot ug nakarehestro sa pangalan namo’ng duha. Karon nga namatay na ang akong  bana plano unta nako nga ibalhin ang pangalan sa maong balay ug yuta ngadto sa akong ngalan ug sa duha nako ka anak. Ang problema kay mga menor de-edad pa ang akong duha ka anak. Unsa man nga dokumento ang akong ipahimo aron mabalhin sa among pangalan ang among house and lot? Kinsa may mopirma sa habig sa akong mga anak sa maong dokumento nga pulos man ni sila menor de edad? - Sanny

* * *

Dear  Sanny,

Kun gusto ka nga ma-transfer ang pangalan sa maong property ngadto sa ngalan ninyo’ng mga heirs, magpahimo ka og Extra Judicial Settlement of Estate. Kini gitugot sa atong balaod nga kun magkasinabot ang mga heirs mamahimo’ng bahinon ang kabilin sa namatay nga dili na moagi pa sa korte basta walay utang nga gibilin ang namatay ug walay mga menor de edad nga mga heirs  (Rule 74, Section 1, Rules of Court). Bisan kun sa imo nga kaso pulos menor de edad ang imong duha ka anak, dili kana problema kay isip inahan sa mga bata ikaw maoy natural guardian kanila ug dili na kinahanglan nga moagi  pa sa korte ang pagtudlo kanimo nga guardian. Ikaw maoy mo-represent sa mga bata sa pagpirma sa maong Extra Judicial Partition aron ma-process ang pag-transfer niini human sa inyong pagbayad og estate tax ngadto sa BIR. - Atty. Divine

* * *

Alang sa inyong pangutana, ipadala lang sa Legal Corner sa Banat News  V. Gullas Street, Cebu City or email sa [email protected]. ug akong tubagon ang inyong pangutana pinaagi sa akong column matag Miyerkules ug Domingo.