Imoral gihapon kun wala sa lagda

Makatabang alang kang Bise Presidente Jejomar Binay kun iyang tubagon punto por punto ang mga pasangil kabahin sa P2 bilyones nga parking building sa siyudad sa Makati.

Kining isyuha ang gikuninitan sa iyang mga kontra nga sila’ng Senador Antonio Trillanes ug Alan Peter Cayetano.

Ug musamot pa ang pag-antos ni Binay human si Senate President Franklin Drilon miingon niadtong miaging semana nga wala’y plano ang Senado pagpahunong sa senate inquiry sa giingong overpricing sa maong edipisyo.

Mibalos unta ang kampo ni Binay pinaagi sa pagpabuto og mas dako nga isyu, ang pag-expose sa mga senador ug kongresista nga nakadawat og impounded fund gikan sa Disbursement Acceleration Program sa Malacañang, apan mi-boomerang man hinuon kanila tungod kay aduna may mga personalidad nga ilang kaalyado nga apil usab sa nagpakadawat.

Ambot kaha og may nakabadlong ba ni Navotas Rep. Tobias Tiangco, ang tigpamaba sa United Nationalist Alliance, sa pag-expose sa mga ngalan sa mga kongresista ug senador nga nakadawat og pundo gikan sa DAP, nga naapil ang ilang mga kauban.

Ang dokumento nga nahuptan ni Tiangco gikan mismo ni Budget Secretary Butch Abad, sa ato pa, dili na kinahanglan pa nga ipasiatab ni Tiangco kun “reliable” ba kini.

Tungod kay natandog man ang imahe sa bise presidente ning panahona human gipatolan sa Senado ang isyu sa parking building sa Makati pinaagi sa media, buot tingaleng mahitabo sa iyang kampo nga matabunan kini pinaagi sa pagyagyag sa mga magbabalaod nga nanagpakadawat og DAP.

Alang kanako, dili maayong wad-on ang pakisusi sa mga isyu nga naglambigit sa kuwarta sa katawhan gikan sa buhis. Kun aduna man ugaling overpricing sa Makati City parking building, angay kining tukion ug patubagon ang angay patubagon.

Sa samang bahin, kun tinuod nga adunay nanagpakadawat sa DAP funds, angay silang pangutan-on asa nila gigasto ang pundo.

Sama pananglit ni Kongresista Tomas Osmeña nga apil sa nakadawat og DAP funds nga nagkantidad og P124 milyones, maayong kuwentahan niya ang mga residente sa among lugar sa south district unsa ang gigamitan niya sa kuwarta.

Sama ni Mayor Mike Rama, nagduda ko nga tua gihapak sa laing lugar ang maong pundo mao nga dili kini makit-an sa south district, dili sama kang kanhi Kongresista Tony Cuenco nga makit-an ra ang mga proyekto.

Dili pakiluoy ngadto sa katawhan ang angay buhaton ni Tomas, kun dili accounting sa mga proyekto.

Kun moingon siyang dili imoral ang DAP bisan ilegal kini, sayop siya. Ang paggamit sa buhis sa mga tawo nga supak sa lagda, imoral gihapon kini.