Lisud buhaton ang sayon

Usahay may mga butang nga atong gihunahuna nga sayon kaayo buhaton pero lisud diay mahimo. Bisan unsa nga butang basta dili kita makahibalo lisud gyud na. Busa kanunay kita magkat-on sa ka praktikal sa mga butang.

Sama sa elektrik fan o bentelador, kun wala ka masayod unsaon pagpaandar niini, aw makuryentehan kana lang, lisud gyud ni kanimo. Sayon ra unta apan kay wala ka may kasinatian, o wala’y kahibalo sa mga ginagmay nga mahinungdanon alang sa atong inadlaw nga gimbuhaton.

Gani kanang bag-o ka lang kasakay sa elevator, dili tiaw ang kakulba nga bation mo. Kun unsaon ang pagmaniobra, pagpahunong o asa ka gusto muadto. May mga pinduton ka nga maoy motultol sa buhaton. Unsaon man, di ba lisud gyud basta dili kita masuheto niini.?

Diha kadtoy panghitabo sa layong dapit nga kalit lang nihunong ang kotse nga iyang gimaneho kay napawong ang makina. Pagkaugma na miabot ang gitawgang mekaniko. Wala’y minuto miandar dayon kay giuli ra ang natangtang nga kable sa batereya. Sayon ra gyud apan lisud kay way hanaw.

Hinuon aron mahimong sayon ang lisud buhaton, magkat-on kita sa mga butang nga praktikal ra nato kini makamaohan. Magkuryoso sa uban o mag-obserbar kun unsay gihimo aron usab mao unya ang buhaton mo ig-abot sa panahon nga imo na kining gikinahanglan.

Permi magpakisusi aron lang aduna kay ideya kun unsay mahimo niini nga may dakung kapuslanan kanato.

Busa angay dili iwakli ang pagbaton og praktikal nga kahibalo, sa paagi malikayan nato ang ginagmay nga kahasol, nga may dakung kalangan kanato.