EDITORYAL - Martial Law

Karong adlawa ang ika-42 nga kasumaran sa pagdeklarar ni  kanhi Presidente Ferdinand Edralin Marcos sa martial law. Niining petsaha epektibong gisugdan ni Marcos ang iyang dose ka tuig nga pagdumala gamit ang pwersa.

Tungod sa pagpangabuso, kurapsyon sa mga cronies ni Marcos ug ang padayong pagtamak sa katungod sa katawhan sa mga anaa sa gahom, midaghan ang mga kaaway ni Marcos gikan sa politika hangtud na sa Komunista.

Tungod niini gipatuman ang Proclamation No. 1081 kon Martial Law. Kini naghatag og garantiya nga magpabilin sila sa  pwesto uban sa iyang mga cronies.

Apan dinhi nasayop si Marcos, inay nga motalaw ang mga tawo midaghan hinuon ang nahimo niyang kaaway. Atol sa paghari sa mga Marcos, daghang mga tawong iyang mga kontra nga nangahanaw, ang uban gipatay, dunay nanglayas ug gidid-an usab ang kagawasan sa media.

Niadtong Enero 17, 1981 pormal kining gilibkas ni Marcos, tungod sa umaabot nga pagbisita ni Pope John Paul II sa bulan sa Pebrero 1981. Ug mihimo og eleksyon nga "lutong macao" kay siya ray nipili sa iyang kaatbang, siya gihapoy midaog.

Bisan sa paglibkas sa Martial Law, nagpabilin gihapon ang gahom ni Marcos pinaagi sa iyang napagawas na nga presidential decrees, legislative powers ug labaw sa tanan ang suspension of the privilege of the writ of habeas corpus hinungdan nga nagpadayon ang pagpangabuso sa militar ug kapolisan.

Daghan karon sa kabataan ang wala na masayod sa kamahinungdanon niining bahina sa kasaysayan sa Pilipinas.

 Apan sama sa panahon sa Ikaduhang Kalibotanong Gubat, wa pa kaayo makasabot ang kabataan dihang gideklarar ang Martial Law.

Kung duna may moabot pang susamang mga hitabo sa Pilipinas, makasalig gihapon ang nasud nga ang kabataan niini dili motugot nga magpabilin ang pagkagapos niini.

Makapaabot kini nga sama sa gibuhat sa nanglabay'ng kabataan, molighot g'yud gihapon kini.