Hangtod sunod lunod
Human sa pagkalunod sa MV Maharlika Dos samtang naglawig gikan sa Southern Leyte paingon sa Surigao, segurong mahitabo ang mosunod:
Mosibaw ang awhag sa pag-imbestigar sa katalagman ug sa pagsilot sa mga responsable;
Ipahigayon ang special board of marine inquiry (SBMI) o pormal nga pakisusi sa panghitabo;
Mobaha ang emosyon sa mga tagtungod sa mga nangamatay atol sa imbestigasyon ug puno sa pasalig ang mga imbestigador nga makaangkon og hustisya ang mga biktima;
Tak-opan ang SBMI, motak-om ang mga imbestigador sud sa pila ka buwan, dayon moluwat og mga rekomendasyon dayong tangkod nga usa ka tuig human sa trahedya; ug
Tun-an sa Board of Marine Inquiry (BMI) sa Department of Transportation and Communication (DOTC) ang mga rekomendasyon.
* * *
Moligid ang laing mga buwan una makaumol ang BMI sa ilang hukom. Nga ila lang ipagawas kon siging-sigingon na sa mga biktima ug sa mga sakop sa media. Di mabasol ang mga makigpustaanay nga masaligon kaayo sa mosunod:
Way tagduma ni tripulante sa nalunod nga barko ang makiha ni masilotan;
Sama sa naandan, mameligro ang kinaiyahan ug ang Labaw’ng Makagagahom nga mao na say tulisukon nga responsable sa trahedya;
Irekomendar nga higpitan ang pagsusi sa seaworthiness sa mga barko, paglista sa tanang pasahero sa manifesto ug pagpaminaw sa mga pasidaan sa Pagasa sa dagkong bawod; apan
Way bisan usa mga rekomendasyon ang mapatuman.
* * *
Sa di ka pa mosalikway nga lunlon pangagpas ra ang tanan nimong nabasa sa ibabaw, pahinumdoman ka namo nga:
Usa ka tuig ug usa ka buwan na human sa panagbangga sa MV St. Thomas Aquinas ug MV Sulpicio Express Siete nga nisangpot sa kamatayon sa kapin sa gatos ka pasahero ug tripulante;
Girekomendar sa mga imbestigador nga tukuron ang Vessel Management Traffic System, butangan og mga boya ug ayuhon ang parola aron paglikay sa bangga sa magkasugat nga mga barko sa Lauis Ledge; ug
Wa pay bisan usa sa mga rekomendasyon nga napatuman.
* * *
Di ta mahuman dinhi kon hisgutan ang tanang nagbalik-balik nga kalapasan sa mga kompaniya sa barko sa mga lagda sa luwas nga paglawig sa mga pasahero ug kargamento ug sa makiangayong pag-atiman sa mga pasahero. Mabuntagan sab ta og hisgot sa mga higayon nga napakyas ang gobyerno sa pagpatuman sa mga lagda batok sa mga malapason.
Dako natong garbo nga sa nasud nga nabuak-buak sa kaliboan ka isla ang Sugbo maoy sentro sa maritime industry kay nia magbase ang labing dagkong kompaniya sa barko. Apan ang gobiyerno pa ba maoy nagduma sa industriya? O ang mga tag-iya sa barko, salamat sa dako nilang puntil nga mapuslanon sa kampanya sa piniliay, maoy nagbuot unsa ray mga lagda nga ikapahamtang sa gobiyerno batok nila?
- Latest
