Ang dugokan sa katahom

Ang atong mga mata maoy mohusga sa kaanindot sa usa ka maayong talan-awon nga makita. Managlahi ang interpretasyon sa mga motan-aw niini. Magdepende kini sa kahulugan o pangagpas nga natawo diha sa hunahuna.

Dili ta makaingon kon unsay tan-aw nimo, mao usab ang nakita sa uban.

Ilabi na gayud kon tawo ang atong sud-ongon, maimpres dayon kita segun sa atong makita. Maoy nakadani nato ang iyang pisikal nga panagway.

Hinuon, ang tahas sa mata, maora man ang paghulagway sa ngil-ad ug sa katahum sa usa ka binuhat. Adunay atraksyon nga di ka makabalibad sa pagdayeg.

Mahimong nabihag ka’s katahum niya apan tulokibon pa nga tugkaron ang kamatuoran kon unsa ug ngano naingon ka niani. Kay sagad gud, lamaton ang atong kalimutaw nga magsiga nga nagtutok sa katahum. Buot kitang dalhon diha sa pantasya, hinikalimtan ang hunahuna nga maoy angay mohashas sa iyang nakita. Sagad gud malimbongan man kita sa panan-aw.

Usahay mawala ang maayong paminsar kay naulipon na sa hilabihan ang pagbati o ang kasingkasing nga mao nay nagdominar sa atong pagkatawo.

Apan padayon ang kaisipan ug ang galamhan nga nagdiskubre sa katinuoran.

Hangtud inanay naamgohan ang paglubad sa pagdayeg.

Kay ang dugokan sa tinuod nga katahum mao man ang katibuk-an sa atong pagkatawo. Ang repleksyon sa katahum natingob man diha sa maayong relasyon, pagsinabtanay, pag-inunongay ug kaaghop sa maayong kinaiya.

Magpabilin nga way kinutuban ang katahum bisan hamokon pa kini sa mga ngil-ad nga intriga sa kinabuhi.Bisan pa siya usa ka laksot, matahum gihapon siya.