Ang Amerika nanawagan sa China pagtabang sa kampanya batok terorismo ug ang hulga karon nga gidala sa Islamic State of Iraq and Syria kon ISIS sa Middle East.
Gipangutana sa usa sa mga top official sa Amerika ang China kon unsay ilang mamahimong kontribusyon kalabot niini. Ang ilang tubag, suportado nila ang aksyon sa Amerika batok sa ISIS.
Ang China nag-atubang usab karon og hulga gikan sa Xinjiang Province nga pinuy-anan sa tribung Muslim Uighurs.
Kaniadto pa, ang Uighurs wala moila sa awtoridad sa China, ug karon lang bag-o nahimo nang dayag ang ilang pagsupak batok sa mga Komunistang Han (Chinese) nga naghari-hari sa ilang lugar pinaagi sa pagpangatake.
Ang usa ka opisyal sa China mipadayag nga pabor sila sa plano sa Amerika nga palabwan pa ang gihimong military strikes batok sa ISIS. Matud pa niya nga ang China nagtuo nga kinahanglan ang tanang mga nasud motahod sa “international laws,” teritoryo ug soberiniya sa usa ka nasud.
Ang maong pamahayag dako kaayong sukwahi sa ilang gipanghimo karon sa West Philippine Sea. Giilog nila ang mga teritoryo sa Pilipinas, wala nila tahora ang soberiniya sa mga Filipino ug labaw nang wala nila respetoha ang international laws.
Ang gipakita sa China usa ka klasikong ehemplo sa “double standard.” Duna silay kaugalingong interpretasyon sa teritoryo, soberiniya ug international law nga wala mauyoni sa international community.
Sa pagkakaron, lima na ka atolls, ug shoals sa Kalayaan Group of Islands ang ilang gipang-reclaim. Ang Pilipinas naghuyhoy ang abaga nga nagtan-aw sa konstruksyon ug walay nahimo nga pugngan kini.