Interest sa utang

Dear Atty. Divine,

Duna lang unta ko’y ikonsulta nimo labot sa akong problema sa utang. Niadtong May 2014, nangutang ko sa tigpatanto og P90 mil ug ang maong utang kinahanglan nga bayran sulod sa usa ka tuig. Karong bag-o naka loan ko sa PAG-IBIG ug gusto nako nga bayran na lang ang tanan nako nga utang, apan ang akong giutangan miingon man nga mahimo ko nga mobayad sa principal apan kinahanglan sad nga bayran nako og apil ang interest hangtud sa May 2015. Sa akong gipirmahan nga Promissory walay nakabutang didto nga interest apan matag buwan adunay gipahamtang niya nga interest nga 4%. Unsa may maayo nako nga buhaton? Daghang Salamat. -Julie

Dear Julie,

Kon mangutang ka sa bangko ug mobayad ka sa principal sa dili pa ang maturity date, wala na kay obligasyon sa pagbayad sa interest niini sa mosunod nga mga buwan kay imo  na man nga giuli ang principal. Apan lahi ‘sab og balaod nang imong giutangan kay pabayron pa man ka sa interest sa mosunod nga mga buwan bisan kon imo na siyang nabayran sa imong gihuwam. Kon wa mabutang sa imong gipirmahan nga promissory note kanang iyang gipangayo kanimo nga  interest, dili ka obligado nga mobayad niana. Matud pa sa Article 1956  sa New Civil Code: “No interest shall be due unless it has been expressly stipulated in writing.” Busa sultii ang imong giutangan nga wa masubay sa balaod ang iyang gibuhat ug mahimo nimo siya nga ireklamo kon mamugos siya sa pagpabayad kanimo sa interest. - Atty. Divine

Alang sa inyong pangutana, ipadala lang sa Legal Corner sa Banat News, V. Gullas Street, Cebu City or email sa [email protected] ug akong tubagon ang inyong pangutana pinaagi sa akong column matag Miyerkules ug Domingo.