Sa siyudad unya ang gubat

Sa umaabot nga mga adlaw, samot na nga ato’ng madunggan ang makabungol pa nga siyagit niini’ng mga nagpakaaron-ingnon nga mga environmentalist. Ug dinhi mismo sa dakbayan sa Sugbo na usab sila magwara-wara.

Ato na’ng nasaksihan ang ila’ng mahait nga oposisyon sa pagputol sa mga kahoy nga naglinya sa highway sa pipila ka lugar sa south.

Nagmadaugon sila tungod kay gihunong una ang pagmasaker sa mga acacia didto. Karon ari na usab sila molusad og dako’ng gubat sa dakbayan sa Sugbo. Ug sa umaabot nga mga bulan, alegre na usab kini’ng giingon nga mga environmentalist pagtikaw-tikaw sa ato’ng kadalanan.  Sa nakalabay nga mga adlaw, adunay taho nga mokabat sa 2,000 ka kahoy ang maapektohan kon mapatuman na ang Bus Rapid Transport project ning dakbayan sa umaabot nga mga buwan.

Kini’ng mao’ng mga kahoy anaa karon naglinya sa mga rota sa BRT, ilabina diha sa Osmeña Boulevard. Walay mahimo ang nagpaluyo niini’ng mao nga dako’ng proyekto kun dili ang pagputol ug pagbalhin niini’ng mga kahoy.

Apan karon pa lamang, miangal na ang mga nagpakaaron-ingnon nga mga environmentalist. Gani mipasidaan na sila sa mga proponent sa BRT sa pagtuon og maayo ug dili gayud paghilabot sa mao’ng mga kahoy.

Tungod kay dili gayud kalikayan kini’ng mga protesta, problema na usab karon kon unsa ang maayo nga paagi alang niini’ng mga kahoy. Kadto’ng madala pa, angay lamang nga ibalhin sa pagtanom.

Hinuon kadto’ng mga kahoy nga dili na madala, kinahanglan lamang siguro nga putlon. Wala na siguroy mahimo pa ang kagamhanan niini. Apan mao lagi, moulbo na usab kini’ng mga protesta.

Kahinumdoman nga pipila niini’ng mga environmentalist maoy nangugat aron gayud mapatuman ang BRT ug dili ang light rail transit nga maoy usa sa gi-proposed nga mass transport system alang dinhi sa Sugbo.

Ug karon misungag na usab sila sa BRT gumikan kuno kay dagha’ng mga kahoy ang mapildi sa mga rota niini.

So maka-expect na usab kita og mga protesta sa kadalanan inig patuman na unya sa mao’ng proyekto.  Ato lamang nga panid-an ang dagan niini’ng mao’ng proyekto.

Ug kon magsilbi ba unya ang mga protesta, ato lamang nga atangan.