Sa mga kontes sa sports, sama sa lumba sa dagan, kinahanglan aron ikaw makaseguro nga mag-una o modaug, kinahanglan makat-on ka sa mga diskarte kun unsaon nga motulin ka nga makaabot sa dag-anan.
Wala kini kalainan sa lumba sa kinabuhi, nga kun wala kay inantigo nga paagi, malagmit maluya ka. Ug dili makalahutay, sa mga babag aron ikaw tumpagon sa imong pakigbisog, nga modaug sa pangandoy mo sa kinabuhi.
Sa kinabuhi, angay tun-an gayud pag-ayo ang mga nasinati mo sa kinabuhi. Dinhi ikaw mamalandong nga maghimo og pormula. Kun unsa kadtong hinungdan sa imong kapakyasan, dili na nimo kini subayon pagbalik.
Maningkamot nga dili ka maugtas sa sunod mong arangkada. Himoan mo kini’g bag-ong lakang, nga motulin ka paingon sa kalamposan. Sa una nimong tikang sa unahan, moatras ka sa pagtigum og hangin. Aron ikaw makahunat, uban ang pangaliya sa kahitas-an, makaseguro kana sa imong kadaugan.
Kun modaug ka man, timan-i gayud nga samtang may kinabuhi pa, daghan ang tentasyon nga bitaron ka pagbalik, sa imong gigikanan nga puno sa kasakit. Busa pagmatngon nga imong maampingan, ang hiyas ngano ikaw nagmalampuson. Sagad gud, mosubra na ang pagsalig sa kaugalingon.
Daghan na nga namugnang kasamok o kompromiso. Oo, nag-antus siya kaniadto sa kalisdanan. Apan karong nakapahimulos na pag-ayo sa kinabuhi, labaw pang kasakit ang iyang giantus ug pagmahay. Unsaon nataligam-an man ang hinungdan, ngano siya gihatagan sa maayong kapalaran.