Pipila ka mga polis na ang nakalas sa kampanya batok sa drugas. Sakripisyong ilang gibayran pinaagi sa ilang mga kinabuhi tungod sa pagsunod sa ilang kaakohan isip mga tinugyanan sa balaod.
Makiangayon lang nga pasidunggan ug ilhon ang maong mga polis nga nakalas samtang gukdon kadtong mga polis nga nagpabadlong.
Ang pagkamatay sa maong mga polis nakapukaw sa ilang mga kauban gikan sa nagkadaiyang bahin sa Central Visayas. Ning tuiga lang, minilyon ka pesos nga balor sa illegal drugs ang nasakmit sa kapolisan.
Sa paglingkod sa bag-ong hepe sa Police Regional Office-7, Chief Superintendent Prudencio Tom Bañas , mibahad na kining daan nga ang mga drug lords na usab ang ilang panggukdon human sa mga nagsunod nga operasyon batok sa mga drug pushers sa street level.
Ang katawhan nagtan-aw sa gibuhat sa mga polis, unta dili lang kutob sa bahad ang ilang himuon ug dili lang pang-atik ang kantidad sa mga shabu ug uban pang matang sa drugas nga ilang mga nakuha.
Mabantayan man gud nga bisan sa kagamay sa nasakmit nga shabu, pwerte mang dakoa sa pagbana-bana sa mga polis sa presyo niini “street value” matud pa.
Tinuod ba kaha nga epekto kini sa ilang mga operasyon ug naapektahan na g’yud ang supply niini? O ba kaha sila ray nagpaburot sa presyo niini aron makaingon ang tawo nga dako ang ilang agi sa nanglabay nga mga bulan.
Sa laing bahin, bigtime druglords ba gyud kining mga na-neutralized? O basin gibunyagan lang sila aron madugang sa listahan kunohay sa accomplishments. Unta dili mausik ang sakripisyo sa mga nakalas nga polis tungod niini.