Kasagaran kon maghisgot kita og tubig ang mosantop sa atong hunahuna mao man dayon ang kamatayon. Diha sa kalibutan sa mga damgo ang tubig simbolo sa kinabuhi, ang pagsakay sa usa ka sakayan nga simbolo sa direksiyon ug self-discovery timailhan usab sa usa ka pangindahay sa pagkaplag sa tumong o padulngan. Ang tawo nga anaa sa taliwala sa halapad nga dagat mao ang tawo nga nakahupot diha sa iyang sub-conscious og kahadlok nga mag-inusara diha sa panaw sa kinabuhi. Butang nga magdapit unta kanato sa dakong bili nga maantigo kitang moangkon ug modawat sa dakong posibilidad sa pag-inusara sa panaw sa pagdiskubre sa atong kaugalingon.