CEBU, Philippines- Dako’ng tinonto ang gisugyot nga balaudnon ni Senator Vicente “Tito” Sotto nga ang mga sakop na lang sa pamilya sa drayber o tag-iya sa motor maoy tugotan nga makaangkas sa mao nga matang sa sakyanan.
Sigurado ko nga daghan kami nga managsama og baruganan niini nga isyu tungod kay puwerte’ng daghana nga mga tawo nga walay sakyanan. Dili ko motuo nga ang senador wala masayod nga misaler ang mga “habal-habal” kay ang gobiyerno napakyas man pagpadagan og mga sakyanan sa mga hilit nga dapit. Kon nakatuman pa lang ang kagamhanan sa ilang gitahas nga serbisyo ug gipaninguha nila nga mapadaganan og mga sakyanan ang hilit nga dapit sigurado ko nga walay gusto mosakay og mga “habal-habal.” Risgo kaayo sa katawhan ang pagsakay og motorsiklo nga gigamit pagpamasahero apan walay mahimo kadaghanan gawas sa pagsakay na lang kay wala may sakyanan nga pasaheroan nga nagbiyahe sa mao nga mga dapit.
Sama diri sa among dapit sa Barangay Apas, ibabaw nga bahin nga habig na gani sa Barangay Busay, kami mapugos sa pagsakay og habal-habal kay sa mag-antos paglakaw.
Kon ang gisugyot nga balaod ni Senador Sotto hingpit nga maaprobahan isip balaod, magpasabot kini nga dakpon na ang mga drayber sa habal-habal. Ang gusto tingali ni Senador Sotto nga ang tanang tawo sakripisyohon.
Kon ang balaudnon ni Senador Sotto hingpit nga maaprobahan magpasabot kini nga bisan ang atong paryente o silingan labyan na lang nato bisan kon aduna pa kita’y motor kay dakpon man kon sila atong pasakyon. Sa laktod, binuang kini nga balaudnon ni Senador Sotto. Kon ang iyang tumong mao ang pagsumpo sa mga tawo nga manulis ug mag-tandem nga magsakay’g motor, dili tingali kini maoy sulbad.
Sigurado ko nga bisan pa og maaprobahan kini nga balaudnon ni Senador Sotto apan dili kini mapatuman sa mga sakop sa LTO kay daghan man gani kaayo’ng mga dakponon nga wala nila matagad.
Mag-unsa man kon adunay balaod apan dili ipatuman? Ang maayo tingali ni Senador Sotto mao ang pagpangita og balaudnon nga kapahimuslan g’yud sa kinabag-ang katawhan.
Sama sa pagpahamtang og silot sa kadagkoan sa LTFRB ug LTO kon dili nila masumpo ang mga PUJ nga nagdagan nga dunot na kaayo, ang mga lingkoranan ug sandiganan sakit na kaayo modapat sa imong lawas.