Usa ka inahan adunay dakong panginahanglan dili alang sa iyang kaugalingon kondili alang sa iyang anak nga dunay balatian. Bisan pa man kon siya gihulagway ingon og sama sa usa ka iro, apan padayon gihapon siyang nihangyo sa Ginoo nga unta mamaayo ang iyang anak. Adunay dakong pagsalig ang maong babaye. Sa dihang siya miingon: "Anak ni David" titulo kini sa pagka-Mesiyas. Timailhan kini nga ang maong babaye adunay paglahutay ug dunay determinasyon. Sama usab sa atong kinabuhi. Adunay mga higayon nga daw mawad-an kita sa paglaum gumikan sa pagsalindot sa atong mga hangyo. Apan mao kini ang atong hinumdoman nga ang Ginoo padayon nga maminaw ug mobati kanato bisan pa man tingali kun kita gisalikway sa kinabag-an gumikan sa atong kahimtang ug baruganan.