Pakauwaw sa DPWH
Usa ko sa nibilib sa liderato ni Kalihim Rogelio Singson sa Department of Public Works and Highways (DPWH). Gikan sa malampuson niyang paglimpiyo sa mga subasta ug pagpatuman og mas daghan ug mas maayong kalidad nga mga proyekto ngadto sa paghipos og dakong savings nga maggamit sa dugang kapuslan nga mga proyekto.
Apan nahugno ko sa di malalis nga mga ebidensiya nga ang kaligdong ug katakos ni Singson wa manakod sa pipila ka lokal nga mga opisyal sa DPWH sa Sugbo ug Central Visayas. Di ta kinahanglang motan-aw sa layo. Makita sa atong kaugalingong nataran ang kalangay ug kabus nga kalidad sa pipila ka proyekto dinhi sa ato.
* * *
Labing nakahasol sa mga motorista ug mga pasahero ang kalangay sa pagsemento sa dan nga nagsumpay sa Lapu-Lapu City ug Cordova. Maayo na lang nga sa kataposan nahuman ra gyong proyekto. Bahala kun naghiwi ang sinumpayan sa taliwa sa sementadong dan paingon sa Barangay Maribago, makalahus-lahos nang mga sakyanan.
Mas lisod sabton ang kahibulongan nga dan tungod sa Mactan Export Zone (MEZ) sa Barangay Ibo: Human sa gamay ra kaayong liko, ang imong gisubay nga lane mao nay agian sa imong kasugat nga mga sakyanan. Mga trabahante sa MEZ nitug-an namo nga daghan na uyamot nga mga aksidente ang nahitabo ning makalibog nga bahin sa dan.
* * *
Ambot giunsa ni pagmatik-matik sa kontraktor nga gibayran pagpalapad ug pagsemento sa dan. Ambot nganong gidawat sa DPWH ang way klarong proyekto. Gawas nga mokalit lang og usab ang direksiyon sa lanes, wa pa gyoy klarong sukod ang gilapdon.
Nahibaw-an nako gikan sa Lapu-Lapu City Hall nga upat ka lanes ang orihinal nga desinyo sa dan. Apan ang aktuwal nga maagian usa ug tunga ka lanes ra sa pikas ug pikas. Di tungod sa mga sakyanan nga nagparada sa daplin, nga maoy nahitabo sa kasagarang gipalapdan nga mga agianan, kun dili tungod kay nakan-an ang dan sa nasobrahan ra kalapad nga sidewalk.
* * *
Niadto ra kong nagduda sa katakos ug kaligdong sa liderato ni Direktor Ador Canlas sa DPWH 7. Nasamotan lang ning kuwestiyonableng proyekto sa Ibo, apan nagsugod sa ilang pagdupa sa kontraktor nga gipasanginlang nitago sa mga punoan sa kahoy gikan sa gisemento nga Serging Osmeña Road sa North Reclamation Area sa Dakbayan sa Sugbo.
Inay mobaraw sa binuang sa kontraktor, gidasonan ni Canlas ang pangangkon nga ang baha gikan sa nabuslot nga tubo sa Metro Cebu Water District maoy nakapatumba ug nakapawa sa mga kahoy. Inay paninglan ang kontraktor sa danyos, andam ang DPWH nga maoy moggasto sa pagpamalit ug pagpananom og kaliboan ka bakhaw puli sa dul-an sa gatos ka fire tree ug ubang kahoy nga klarong gikawat.
- Latest
