Daygon si Bistek

Nakatilaw og duha ka tamparos ni Quezon City Mayor Herbert Bautista ang Chinese National nga nasakpang nagdala og napulo ka kilo’ng shabu nga gibana-bana’ng mokantidad og  P15  milyones.

Nausab ang timplada ni Mayor Bautista, nga naila usab sa angga nga Bistek, diha’ng daw sama sa gibugal-bugalan lang sa nadakpang insik ang balaod sa Pilipinas ug ang gipakita niini’ng pagka walay respito ngadto sa mga otoridad.

Sa wala pa mahitabo ang pagpanamparos, gitabako-tabakoan ug gipahiyom-pahiyoman lang sa giingong drug lord nga insik ang mayor ug mga polis. Gipakita sa insik ang pagka walay respito ug kahadlok niini sa mga otoridad sa Pilipinas.

Ang Commission on Human Rights (CHR) wala makauyon ug misaway sa gihimo ni Bistek. Nangayo og pasaylo si Bistek tungod sa iyang gihimo. Pero angayan bang mangayo og pasaylo si Mayor Bistek sa iyang gihimo ngadto sa giingong drug lord nga insik?

Dili! Gani, angayan nga daygon ug abibahan si Bistek sa iyang pagtamparos sa insik inay kay siya sawayon.

Tungod sa gihimo ni Bistek dili man makasabot sa atong pinulongan ang giingon nga drug lord nga insik pero sa tamparos nga iyang nadawat gikan sa mayor labing seguro nakasabot na siya nga sayop ang iyang gihimo.

Hinuon ato usab nga sabton ang CHR sa iyang pagpanaway ngadto ni Mayor Bistek tungod kay mao man kini ang ilang trabaho.

Salikwaot man usab nga paminawon kun ang nahisgotang commission moapil sa pag-abiba sa pagpanamparos ni Mayor Bautista ngadto sa insik nga drug lord.