Si Sen. Serge Osmeña adunay dugo nga Sugbuanon tungod kay anak kini ni kanhi Mayor Serging Osmeña, ug igsuon sa kanhi mayor sa dakbayan, Tomas Osmeña.
Apan nagduhaduha ko kun aduna ba kini kasingkasing sa usa ka Sugbuanon.
Nakaingon ko niini human nako mabasa ang balita kalabot sa contest sa duha ka dagkong kompaniya kinsa ang makapa-ayo sa planta sa kuryente sa Naga.
Sa subasta nga gihimo sa Power Sector Assets and Liabilities Management Corp. (PSALM), nakadaog ang Therma Power Visayas Inc. nga gipanag-iya sa Aboitiz Group of Companies sa tanyag nga P1.088 bilyones.
Apan laing beterano sa industriya sa kuryente sa Sugbo, ang Salcon Power Corp. mipalabaw sa tanyag sa TPVI ubos sa giingon niining “right to top” (katungod nga mopalabaw) ug mibayad kini sa PSALM og P1.143 bilyones. Gihimong basehan sa SPC pagpalabaw sa tanyag ang Section 3.02 sa Land Lease Agreement sa PSALM alang sa 55 megawatt nga planta niadtong 2009.
Apan unsay nakaon ni Serge nga gikuwestiyon man hinuon niya ang katungod sa SPC pagpalabaw sa tanyag sa Aboitiz group didto sa Korte Suprema.
Kinsa man kahay gi-abogaran ni Serge?
Gawas pa niini, adunay mitumaw nga pekeng consumer group nga nagbuotbuot og isyu og pamahayag nga aduna kunoy “power crisis” ang Sugbo tungod kay matud pa ang planta sa Naga wala na mag-operate sukad niadtong Disyembre.
Unsa kahay kalambigitan niining pekeng consumer group sa kawsa ni Serge Osmeña didto sa Korte Suprema?
Apan nabitik ang TPVI. Ang SPC nakahunahuna sa pagtukod na lang og bag-ong planta sa kuryente imbes sa pag-ayo sa karaang planta.
Tungod kini sa reklamo sa mga residente sa Naga diin mismo si Mayor Val Chiong nagkanayon nga dili na sila mosugot nga ayum-ayumon lang ang nangaguba nang planta kay pabilin kining hulga sa panglawas sa katawhan ug sa kalikupan.
Ang SPC Power Corp. mipahibalo nga motukod sila og 100-megawatt coal-fired power plant sa Naga Power Complex.
Si Cesar Villegas, senior manager sa SPC Malaya Thermal Power Plant nagkanayon nga kining bag-ong tukoron nga planta dili makadaot sa kalikupan tungod kay gamitan kini og circulating fluidized-bed combustion technology, sama sa gigamit sa 200-MW Korean Electric Power Corp.
Manghinaut ko nga dili na kini samuk-samukon ni Serge Osmeña.
Kun hilig niya ang paglaban sa interes sa iyang asawa kang kansang pamilya nanag-iya sa Meralco, paglawgaw sa pagpabarog sa Mactan Cebu International Airport terminal aron labanan iyang higala nga nanag-iya sa Filinvest, ug karon ang interes sa pamilya sa iyang ig-agaw nga babaye, hinaot hunahunaon niya ang interes sa mga Sugbuanon.