Dagko kaayo og katawa ang mga environmentalist nga milampos sa ilang tumong pagbabag sa pagpamutol sa mga karaang kahoy daplin sa national highway sa habagatan.
Hinuon, kun nakasiguro lamang sila nga dili mangatumba ang maong mga kahoy ngadto sa karsada tungod sa katiguwang na niini ug depektuso pa ang mga punoan, aw maayo kaayo.
Apan giunsa nila pagsiguro nga dili matumba ang maong mga kahoy? Ug kun matumba man, makasiguro ba sila nga wala’y mga tawo o sakyanan nga madat-ugan? Unsa sila propeta?
Hinuon misaler ang ilang pagbabag kay gimando man ni DENR Secretary Ramon Paje nga ipahunong ang pagpamutol sa mga karaang punoan sa kahoy sa daplin sa national highway didto sa habagatan.
Tingale musamot ang kadagko sa ilang katawa kun may mga kinabuhi unya nga makalas kay madat-ugan sa mabali’ng mga sanga sa maong mga kahoy, ilabi na og kini matumba.
Ang gihimo sa maong mga environmentalist usa ka pagpaka-aron ingnon nga makakontrolar sila kunohay sa pagbuot sa kinaiyahan.
Kumo kay nagpakabana kuno sila sa kalikopan patuohon nila ang mga tawo nga korek na sila sa gituohan nila’ng dili malusno ang maong mga kahoy sa ilang katiguwangon ug sa pagkadepektuso.
Hinuon kining mga tawhana angay imbestigahon o kaha maoy silotan kun adunay laing mga punoan sa kahoy nga matumba ug makakalas og kinabuhi sa mga tawo.