EDITORYAL - Three-meter easement

Ang sunog nga miugdaw og daghang kabalayan sa Sitio Palma, sakop sa Barangay San Roque maghatag og kasayon sa mga opisyal sa dakbayan sa Sugbo paghawan sa tres metros nga tampi sa sapa sa mao nga dapit.

Kun matinud-anon man ang mga opisyal sa dakbayan sa kampanya paghawan sa “three meter easement” sa kasapaan, angay’ng pugngan nila ang mga tagbalay nga tukoran pagbalik ang tampi sa sapa.

Ang dapit nga nasunogan kaniadto’ng Biyernes nahimutang kilid sa sapa nga tumoy sa gitawag og Parian Creek, kini’ng sapa nga dia mag-agi sa ilawom sa mga department store sa dalan Colon.

Ang mga balay sa Sitio Palma sa wala pa masunog milapas na gayud ngadto sa agianan sa tubig ug gihimo nila kini pinaagi sa pagpabarog og dugang mga haligi nga tua na manukad sa sapa.

Kinahanglan nga ang mga opisyal sa dakbayan mohimo’g lig-on nga baruganan nga dili tugotan ang pagtukod og balay daplin sa sapa kun tinuod man ang ilang kampanya pagpabalik sa hawan daplin sa kasapaan.

Ingon niini na lang ang sagad himuon sa mga opisyal, maghuwat nga masunog ang kabalayan daplin sa mga sapa, kay maglisod man sila sa pagpapahawa sa mga hingtungdang pamilya.

Ang mao nga bahin sa sapa kilid sa nasunogan mabaw na kaayo kay wala man kini palawmi ug habwai’g lapok sa kontraktor nga gibayran sa City Hall alang unta sa mao nga gimbuhaton.

Karon, angay’ng tutokan sa katawhan kun may kaisog ba ang mga opisyal sa City Hall nga modili pagpatukod og kabalayan daplin sa maong sapa.