Dear Atty. Divine,
Dunay kabilin nga kabtangan ang ako mama apan iya kining gidonar sa akong duha ka igsuon sa dihang buhi pa siya ug sila karon ang nagpahimus sa maong property. Wa’y laing property ang among mga ginikanan gawas niadtong upat ka ektaryang basakan nga gihatag ni mama sa akong duha ka igsuon niadtong buhi pa siya. Plano karon sa akong duha ka igsuon nga ibalhin sa ilang pangan ang maong property, ang akong pangutana Atty. kun mamahimo ba akong mangayo og share sa maong basakan? Unsa may angayan nako nga buhaton aron ko mabahinan sa maong basakan nga kabilin sa among mama? Hinaut nga imo kong matambagan. Daghang Salamat.
–Ronnie
Dear Ronnie,
Basi sa balaud, kun adunay kabilin ang mga ginikanan kinahanglan nga bahinon kini in equal share sa mga anak isip mga compulsory heirs. Busa bisan kun gidonar pa sa imong inahan ang maong basakan ngadto sa imong duha ka igsuon aduna gihapon ikaw katungod nga mangayo sa imong bahin. Ang bisan unsang property nga idonar sa ginikanan ngadto sa iyang mga anak makonsiderar kana nga advance share sa mga anak nga gihatagan, apan sa higayon nga mamatay na ang mga ginikanan kinahanglan nga sumadahon gihapon ang tanan niyang kabilin lakip na kadtong gidonar aron kini bahinon og patas sa mga anak.Kun way laing property ang ginikanan gawas niadtong gidonar, ang maong property bisan kun gidonar na mao kini ang bahinon og patas sa tanang mga anak nga sumusunod. Ang maayo nimong buhaton karon mao ang pagpakigsulti sa imong mga igsuon labot sa imong tinguha sa pagpangayo og share. Kun di sila mosugot sa imong hangyo mamahimo mo silang ireklamo sa barangay. Apan kun di mo maareglo sa barangay kinahanglan na gyud ka nga modangop sa korte aron imong makuha ang imong share. Thanks and God Bless. — Atty. Divine