Mibati’g kabalaka ang uban nga ang pagpaniid sa Espada sa mga kalihokan sa kagamhanan sa Talisay City maghatag og peligro sa panarbaho sa akong duha ka mga anak sa maong dakbayan.
Ang Espada mituo nga ipatigbabaw sa kagamhanan sa maong dakbayan ang demokratikong pamaagi diin ang hustisya maoy sumbanan ug dugokan sa iyang mga aksyon.
Ang Espada sa sinugdan pa gihimong prinsipyo niini ang pagdayeg sa angay dayegon ug pagsaway sa angay sawayon ug wala ako mabalaka nga pinaagi sa binugoy nga pamaagi hilabtan ang katungod sa panarbaho sa akong mga anak.
Mao bitaw nga may mga proyekto si Mayor JVR nga atong gidayeg, apan atong gisaway ang pagpaka-uwaw nga komentaryo batok sa mga kauban nato sa media.
Ang Espada molaban sa katungod sa taga media nga tarong apan mosaway usab kini sa mga salawayon, hinungdan nga gipaklaro nato ang maong isyu kun may taga media ba nga nagbinastos sa ilang katungdanan o kaha maoy gibinastosan.
Sukad sa pagkasiyudad sa Talisay wala ako makamatngon nga gibinugoy pagdumala sa nanglabay nga administrasyon ang pangagamhanan sa maong dakbayan.
Kay ang desenting pagpanguna maoy akong nasinatian sa mga nangunang opisyal niini busa mitugot ako nga anha manarbaho ang akong duha ka anak.
Ug dako ang akong pagtuo nga sa gihapon maoy sagupon sa atong pamunoan karon ang tinarong nga pagdumala sa maong dakbayan. (wencelen@yahoo.com)