EDITORYAL - Kisaw sa 2016 Elections

Layo pa ang 2016 elections apan nagsugod na ang kisaw sa mga nagkadaiyang interesadong partido ug mga tawong dunay ambisyon nga makabaton og posisyon isip elected officials.

Ang angay magpapili kadto ra gyud untang mga tawo ug mga lider nga ang tumong mao ra gyud ang kaayohan sa tanan  ug dili alang sa ilang kaugalingon ug sa ilang partido.

Misibaw karon ang “Bi-Noy” nga nagpasabot tandem ug duna say “Bi-Mar” tandem nga giduso sa mga grupo nga nakakita kanila nga angayan sa pwesto.  Ang paglutaw sa maong mga pangalan naghatag og imahinasyon ug reaksyon sa nagkalain-laing interest groups.

Duna dayo’y mga mipadungog-dungog og pag-uyon ug duna say daw gisilihan ilabi na niadtong mga nangambisyong maoy ituboy sa ilang partido.

Karong sunod tuig o naghinapos nga bahin ning tuiga, mas maklaro na unya kun si kinsa gyud nga mga pangalan nga mamahimong standard bearers sa ilang tagsa-tagsa ka mga partido.

Tataw kaayo nga duna gyuy “manghilak niini sa hilom” tungod kay dunay mga damgong mahugno ug duna say magmaya.

Ang mahinungdanon, kinahanglan nga ang mga tawo mag-obserbar sa kun si kinsay angayan nga ibutang sa pwesto.

Total anha man na daugon sa “agi” ug kung unsay nahimo aning mga tawhana kun nakatabang ba sila sa kinabag-an ug kung wala ba kini buling sa iyang pangalan ilabi na sa isyu sa kurapsyon.

Ang maghukom ra unya ni bisan kinsa nila mao man gihapon ang katawhan, mga yanong tawo nga wala gani nila mailhi ug mga tawong ilaha serbisyohan kun sila pilion.