Dili na mogamit sa apelyido sa bana

Dear Atty. Divine,

Maayong adlaw kanimo. Duna lang unta ko’y pangutana labot sa akong gigamit nga apelyido. Minyo ko apan nagbuwag mi sa akong bana lima ka tuig na ang nakalabay. Nag-file ko og Annulment case apan pending pa kini karon sa korte. Plano unta ko nga manarbaho sa abroad ug akong ipa-renew ang akong passport. Apan ang apelyido nga gigamit nako sa akong passport attorney kay apelyido pa sa akong bana. Ang akong pangutana, mahimo ba nga inig-renew nako sa akong passport ang ako nang apelyido sa pagkadalaga ang gamiton? - Dora

Dear Dora,

Dili obligado ang usa ka minyo nga babaye nga mogamit sa apelyido sa iyang bana apan kun ikaw migamit na sa apelyido sa imong bana sa imong pagkuha og passport maglisud ka na sa pag-usab niini o pagbalik ngadto sa imong apelyido sa pagka dalaga gawas lang kun imong matuman ang nalatid sa Republic Act kon RA 8239 nga mao kining mosunod: 1.) Death of husband  2.) Divorce  3.) Annulment ug 4.) Nullity of Marriage. Buot ipasabot niini nga tungod kay pending pa man ang annulment case sa imong kaminyuon hayan magpadayon ka gihapon sa paggamit sa apelyido sa imong bana sa pag-renew nimo sa imong passport gawas lang kun mogawas na ang desisyon sa korte nga mag-annul sa inyong kaminyuon nga diin mamahimo na unya ka nga mobalik sa paggamit sa imong  apelyido sa pagkadalaga lakip na sa imong passport. Daghang salamat og God Bless. - Atty. Divine

Kun ikaw adunay pangutana may kalabutan sa problema’ng legal, ipadala lang sa Legal Corner sa Banat News sa V. Gullas Street, Cebu City or email sa [email protected] ug akong tubagon ang imong pangutana matag adlaw nga Miyerkules ug Domingo pinaagi sa akong column.