Right turn anytime sa Banawa wa gitahod

Luag na ang trapiko sa eskina Banawa (M. Velez St. ug V. Rama Ave). Bisan panahon sa peak hour, makairog na ang mga behikulo. Dili sama kaniadto nga moabot ang linya sa mga sakyanan sa may eskinita Horse Shoe Drive. Usahay, molapas pa!

Kini nagpasabot lang nga milapad na ang karsada ning dapita ug natagamtaman sa mga biyahedor ang kanindot sa epekto niini. Mas mopaspas pa gyud unta ang dagan sa pag-abante kun ang tanang drayber motahod pa lang unta sa free lane nga gitagana alang sa mga sakyanan nga moliko sa tuo. Gani, ang ubang dapit nga susamag kahimtang sa eskina Banawa, aduna man gyo’y signage nga gipaskin sa itaas sa poste: ‘Right turn at anytime with care’.

Nga sa ato pa, angay gyud nga ihatag pirme ang maong luna ngadto sa mga behikulo nga moliko sa tuo. Kun ikaw, drayber, dili moliko, ayaw’g alihi ning dalana. Adto linya sa direksiyon nga paabante sa unahan ug ayaw intawon estambayi ning free lane samtang nagpaabot ka kanus-a mo-Green ang traffic light.

Kun tahoron lang sa tanang drayber ang maong free lane, mosamot kahapsay ang trapiko diha sa eskina Banawa, V. Rama Ave., uy! Ato gud ning sulayan, Bay. Nindot lagi ang epekto -- matilawan nato ang katam-is sa bunga sa pagtuman ning mga simpleng traffic signage, rules ang regulations. Ug wa nay ulo sa mga good driver ang molabad. Timan-i: Illiterate drivers lang ang di kaantigong mosunod sa balaod nga makaayo sa tanan. Bisan unsa pa ang imong propesyon, ikaw usa ka nilang drayber nga mga badlungon ug masinupakon, nahimo ka usab nga illiterate. Ngano? Wa man ka mahibawo unsay balaod sa dalan.