Bakak nga SONA

Namakak si Presidente Noynoy Aquino sa iyang taho sa katawhan o State of the Nation Address (SONA) kaniadtong Lunes.

Ang iyang pamakak klaro kaayo sa mga taga Tacloban ug ubang dapit nga giagian ni bagyo’ng Yolanda ug mga napagan sa gubat didto sa Zamboanga. Nagtoo seguro ang pangulo nga kanunay’ng adunay short memory ang iyang mga “bosing” mao nga iyang gilipat ug gibakakan.

Matud sa pangulo nga sa buwan sa Agosto o pipila ka adlaw gikan karon ang mga napagan sa gubat didto sa Zamboanga makabalhin na pagpuyo sa gipatukod sa kagamhanan nga kabalayan para kanila.

Apan sa dihang gisusi sa mga tigbalita ang giingon nga mga balay nga gipatukod sa gobiyerno nga maoy balhinan sa mga napagan sa gubat, wala pa diay kini atop ug bongbong. Sa laktod, dili pa puwede nga balhinan ug puy-an.

Sa iyang SONA, ang presidente miingon nga niabot dayon sa mga dapit nga giagian sa bagyo’ng Yolanda ang tabang gikan sa iyang kagamhanan.

Ang mga sundalo ug kapolisan miabot kuno dayon aron sa paghatag og seguridad ug sa pagmentinar sa kalinaw. Apan ang tinuod kamo nasayod nga pila pa ka adlaw una miabot ang tabang.

Mitumaw usab ang kinawatay ug nahagba ang kahapsay ug kalinaw sa dakbayan sa Tacloban. Dili lang kita ang nakakita niini kun dili nakita usab kini ni Anderson Cooper sa CNN. Wala kaha maglingo-lingo si Cooper kun nabati pa niya ang SONA ni Pangulong Noynoy?

Sa laing bahin, kinsa kaha ang nagsulat sa SONA sa pangulo? Dinhi ba kaha siya sa nasud sa dihang gikuso-kuso kini sa bagyo’ng Yolanda?