Usa ko sa nag-abang diha sa A. Borbajo Street sa Barangay Talamban. Desente ang maong komunidad. Gani, daghan sa mga lumolupyo ang nanag-iya og sakyanan. Kasagaran nga mga lumolupyo tigsuporta sab sa administrasyon sa barangay. Wa lang ko makasabot ngano’ng wala maatiman ang sistema sa drainage ug wala mapalapdi ang hagip-ot nga mga dalan sa maong komunidad sulod sa katuigan.
Nakahibawo man ang mga lumolupyo nga magbaha ang interior nga dapit kun kusog ang ulan. Mao sab kini ang hinungdan nga kutkoton ug malungag ang dalan ug makahatag og kakuyaw sa sakit nga dengue. Tungod ‘sab kay kasagaran sa namuyo diri sa amo lugar kay arangan man busa dunay mga gipanag-iyang sakyanan, dugay kaayo makagawas ug makasulod ang mga magsugat nga sakyanan.
Taud-taud na kining maong suliran sa among komunidad. Naabot na sa kadagkoan sa barangay ug sa Dakbayan sa Sugbo kining maong suliran apan walay nabuhat ang mga opisyal sa pagsulbad niini. Karong bag-o, akong nasayran nga dunay gusto magtukod og edipisyo sa maong dapit ug andam ang tag-iya niini nga mopalapad sa dalan ug magtukod og drainage system. Apan kining maong kalambuan gibabagan sa mga opisyal sa barangay.
Naabot man tuod sa mga hingtungdang opisyal sa Dakbayan sa Sugbo ang maong kahimtang apan nagdumili ‘sab sila sa pag-aksyon dayon.
Dili ko makasabot nganong babagan man ang kalamboan sa usa ka dapit.
Lauman nako nga pinaagi niining pagpaabot sa media sa maong kahimtang, makaamgo ang mga nahitungdang opisyal ug ahensya sa Dakbayan sa Sugbo alang sa kalambuan sa among komunidad, barangay, ug sa tibuok Dakbayan.