Komiks vs. stress

Ning panahuna diin daghang balatian sa panlawas ug problema sa panginabuhi ang giatubang sa mga tawo, dili kalikayan nga ang maong mga tawo -- ikaw ug ako -- kun dili kamao morelaks panagsa maigo gayud sa sakit nga stress.

* * *

Ang stress ra ba, suma pa ining sinuwat sa usa ka doktor, mao roy usa sa mga hinungdan sa kamatayon sa tawo. Dunay mga tambal kuno alang sa stress apan ang labing epektibo nga tambal mao ang “relaxation” o naglingaw-lingaw sa atong hunahuna.

* * *

Naay daghang paagi sa pagparelaks sa atong hunahuna. Duna koy kailang empleyada sa usa ka pribadong opisina kinsa kun dunay problema modangop og komiks lakip na kanang suplemento nga komiks sa Philippine Star matag Domingo.

* * *

Iyang hipuson kining maong komiks ug basabasahon atol sa iyang leisure time. “Malingaw kaayo ko, Day. Maluwas ko sa gubot nga hunahuna,” matud niya.

* * *

Naay uban nga modangop sa prayer book panahon nga makabatyag sila og kamingaw o ba kaha mga suliran sa panginabuhi. Mao kunoy iyang paagi sa paglikay sa stress. Dili kuno siya tiglingaw-lingaw sa tv kay naa kunoy mga eksena nga makalagot ug modugang   lang kuno sa kagubot sa iyang hunahuna.

* * *

Si Noy Carding duna say iyang paagi sa pagkombate batok sa stress kon tensyon gikan sa problema personal. Moadto kuno siya sa buwangan diin, isip cock breeder, malingaw kaayo siya.

* * *

SA LAING BAHIN ... Samtang gisuwat ko kini naminaw ko sa bag-ong tv show ni Sam Costanilla nga mao ang “As Time Goes By” sa CCTN Chn. 47. Nindot. Makaabog sa stress.