Magminyo pag-usab

Dear Atty. Divine,

Duna lang unta ko'y ipangutana labot sa akong kaminyuon. Niadtong miagi'ng buwan gi-grant sa Korte ang Annulment case nga akong gipasaka. Wala kami mga anak, wala sab mi kabtangan. Ang akong asawa attorney may lain na nga pamilya ug ako 'sab nagplano na nga magminyo pag-usab. Mahimo na ba ako nga magminyo kay giuyonan na man sa Korte ang akong Annulment? Unsa may angayan nako nga buhaton aron pagkuha nako og Certificate of No Marriage kon Cenomar sa NSO wala na sa entry ang akong previous marriage? - Diony

Dear Diony,

Mas maayo nga mo-coordinate ka daan sa imong abogado ug pangutana kaniya kun aduna na bay Certificate of Finality nga gi-issue ang Korte may kalabotan sa pag-annul na sa imong kaminyuon. Kun aduna nay Certificate of Finality sa maong desisyon, kinahanglan pa kini nimo nga isumiter sa Local Civil Registrar diin kamo nagpakasal ug sa Local Civil Registrar sa lugar diin nimo gipasaka ang kaso ug padad-an sab nimo og kopya niini ang NSO sa Manila aron ma-annotated ang decision sa korte ngadto sa inyong Marriage Certificate. Gawas sa Certificate of Finality, padad-an sab nimo sila og certified true copy sa imong Petition ug certified true copy sa Order sa korte nga nag- grant sa Annulment. Kun makadawat ka na sa kopya sa imong Marriage Certificate gikan sa NSO nga aduna nay annotation sa decision sa Korte then mao na kini ang panahon nga mamahimo ka na nga magminyo kay na-recorded na man sa NSO ang Annulment sa imong kaminyuon ug hayan dili ka na maproblema niini kun ikaw mokuha og CENOMAR. - Atty. Divine

Alang sa imong pangutana ipadala lang sa Legal Corner sa Banat News sa V. Gullas Street, Cebu City  or email sa [email protected]  ug akong tubagon ang inyong pangutana pinaagi sa akong column matag Miyerkules ug Domingo.