Luoy gayud kaayo ang mga tawo nga madamay lang sa away sa uban. Ug mao kini ang posible nga nahitabo sa pagkahagsa sa usa ka eroplano sa Malaysia Airlines.
Mukabat sa 298 ka mga pasahero ug crew sa Malaysia Arilines Flight MH17 ang namatay sa dihang nahagsa kini niadtong Biyernes. Gani, nakumpirma nga tulo ka Pilipino ang naapil sa maong aksidente.
Gitirahan kuno og missile ang maong eroplano. Matud pa sa U.S. Ambassador sa United Nations, posible nga usa ka surface-to-air missile ang gigamit pagpahagsa sa Flight MH17. Kung kinsa ang responsable, wala pa matino kay nag-imbestiga pa. Duna hinuo’y mga pagduda nga posible nga konektado sa away tali sa mga pro-Russian rebels ug sa Ukrainian army ang nahitabo. Miingon ang U.S. Ambassador nga ang missile gitira sa usa ka lugar nga kontrolado sa mga separatists sa Ukraine. Nag isig basulay na ang Russia ug ang Ukraine sa nahitabo. Ang ilang mga leader nagsige na og paluwat og mga pahayag.
Ang international community mipadayag na usab sa kasuko ug kasagmuyo sa nahitabo. Apan human na, daghan nang kinabuhi ang nakalas. Uwahi na ang basolay. Maghuwat na lang kita sa resulta unya sa imbestigasyon kung kinsa gayud ang responsable.
Mao kini ang sakit nga resulta sa gubat o away. Duna gyu’y mga wala’y labot nga maangin.