EDITORYAL - Internet access

Aduna karo’y lanog kaayo’ng panawagan sa mga netizens o bisan na sa mga mogamit lang sa internet tungod sa ilang trabaho nga iapil ang broadband internet, texting ug voice calls sa kategoriya sa “basic services.”

Panahon na nga usbon ang panglantaw sa maong serbisyo nga “value added services” tungod kay sa internet age, ang mga tawo na lang nga dili gustong mosunod sa paglambo sa panahon mao na lay wala mogamit og cellphone ug internet services.

Samtang nagpunay og panghambog ang mga telecommunications companies sa ila kunohay nga paspas ug sayon kaayo’ng access sa internet, apan layo ra kini kaayo sa tinuod kay base sa ulahi nga report sa ASEAN DNA ning tuiga, 3.6 megabytes (MBps) lang ang gikusgon sa internet service sa mga telcos dinhi sa Pilipinas.

Ang Pilipinas maoy labing hinay og internet sa tibuok ASEAN tungod kay 12.4 MBps ang gikusgon sa ilang mga internet. Kini maoy hinungdan nga magkunsomisyon ang mga internet users kay magsige lang og “loading” ang ilang internet tungod sa kahinay.

Dunay usa ka balaudnon karon nga giduso si House Deputy Minority Leader LPGMA Partylist Rep. Arnel Ty nga padak-an pa ang multa sa mga telcos kansang internet service mora og suso nga nagkamang.

Dili na mawala pa sa alimpatakan sa tawo ang paggamit sa internet niini’ng mga panahona, busa angayan siguro nga usbon na usab sa gobiyerno ang panglantaw niini sa internet service ug angayan na kini tawgon og nag-una nga panginahanglan.