Dalaygon si Padre Obach

Human sa kontrobersiya, si Padre Romeo Obach personal ug mapaubsanon nga nangayo og pasaylo ngadto sa menor de-edad nga inahan nga iyang gipakauwawan atol sa bunyag sa iyang anak.

Kun wala kamo malimot atong gisugyot sa pari, nga una na nga nangayo og pasaylo sa dili maayo niya nga nahimo, apan pinaagi lang sa sulat nga ang pagpangayo og pasaylo kinahanglang himuon gayud niya kini sa personal kay ang iyang pagpakauwaw sa batan-on nga inahan gihimo man niya sa personal.

Sa iyang pagpangayo og pasaylo wala kapugngi ni Padre Obach ang pagpatulo sa iyang mga luha. Sa akong pagsabot, ang mga luha nga midagayday gikan sa mga mata sa pari, maoy dako’ng kamatuoran sa iyang pagkamatinud-anon sa pag-angkon sa dako niya’ng sayop nga nahimo.

Dalaygon ang gihimo ni Padre Obach. Angay nga sama kaniya ang ubang mga pari nga malambigit sa kontrobersiya.

Akong gidayeg ug giyukboan ang pagka mapaubsanon ni Padre Obach tungod kay siya pa ang pari nga akong nahibaw-an nga nakontrobersiya nga nangayo og pasaylo sa dili maayo niya’ng nahimo.

Kay anaay ubang pari diha, bisan og mas dagko pa og sala nga nahimo kun ikomparar nato sa sayop nga nahimo ni Padre Obach, wala gayud makapangayo og pasaylo.

Nagsalig lang kay duphan man gud dayon sa mga Obispo, labi na gayud og duol sila sa palasyo.

Sa laing bahin, ang isyu nga naglambigit ni Padre Obach nagpakita usab sa pagka gamhanan sa katawhan kun kini maghiusa sa pagsaway sa mga hiwi nga binuhatan.