Naleksyon ang tanan sa nahitabo sa pari sa Redemptorist ug sa usa ka batan-ong inahan nga gikasab-an atol sa bunyag.
Sama sa gipaabot, magpatigbabaw gyud ang kinabuhing Kristiyano basta ang tanan matinud-anon lang sa ilang mga pagbati. Way nagpaugatay, ang usa ka habig mipadayag gyud dayon sa ilang kasagmuyo samtang ang usa mabinasulon usab kaayo sa iyang nabuhat.
Si Father Romeo Obach nagpakita lang nga bisan usa siya ka pari, tawo ra gihapon siya nga mahimong masayop. Nakahimo siya og sala nga walay panabi atubangan sa daghang mga tawo nga bisita pa gyud sa dalagita nga iyang gikasab-an. Samtang ang habig sa batan-ong inahan mao usab, dali ra usab nakapasaylo ug misabot kang Obach nga sama sa ordinaryong tawo, masayop gihapon kini ug makasala. Hinuon tungod kay bukas man ang ilang mga kasing-kasing, nagkauliay ang ilang mga buot.
Leksyon kini nga angay puy-an sa tanan, sama sa panultihon nga “don’t judge the book by its cover” sama sa unang pagtan-aw ni Obach sa 17-anyos nga dalagang inahan, nga diin nasayop siya.
Ang angay na lang buhaton sa duha ka habig mao ang paghimo sa ilang mga panaad human niini nga kasikas. Ang batan-ong inahan angay’ng tudloan sa kinabuhing Kristiyano aron sa ingon mapamatud-an niyang nakamata na siya ug naleksyon.
Samtang si Father Obach, kinahanglang atubangon ang kung unsa may silot nga ipahamtang sa iyang kongregasyon kaniya ug sa sunod nga mga adlaw mas mamahimo pa siya nga maayong magtatambag ilabi na sa kabataan nga nagkinahanglan og giya.