EDITORYAL - Nameligro nga kalinaw

Nameligro karon ang unta tiunay nga kalinaw ug pag-abante na sa kalamboan sa Mindanao tungod sa giingong pag-usab sa unod o ba kaha tuyo nga wala pag-apil sa kung unsay gusto sa mga taga Mindanao sa Bangsamoro Basic Law (BBL).

Ang BBL gihimo sa 15-member Bangsamoro Transition Commission, apan human gi-review sa Office of the President giingong daghang  ‘komento’ nga gipasupot nga buot ipausab ug nangatangtang hinuon ang mga probisyon nga maoy gusto sa Moro Islamic Liberation Front ug sa Bangsamoro.

Giingong wala mabutang niini ang kung unsay nasabotan sa Comprehensive Agreement on the Bangsamoro (CAB).

Ang BBL mao ang mamahimong tamdanan alang sa paghimo sa Bangsamoro entity nga usa ka politikanhong pundok aron maoy ihulip na sa gihulagway ni Presidente Benigno Aquino III nga ‘failed experiment.’

Positibo na kaayo ang pagdawat sa kinabag-an sa peace process ug nagkainteres pa niini ang ubang mga nasud ug international NGOs nga gustong motampo sa daling paglambo sa Mindanao.              

Dunay punto ang pagkwestiyon karon sa MILF sa draft sa BBL, kay kung sila pay pasultihon mas wa kini ayo kun itandi sa RA 9054 ang balaod nga nagtukod sa Autonomous Region on Muslim Mindanao (ARMM).

Unta hunongon na ang mga patago nga interes sa pipila diha sa BBL. Kung dili na usab kini mahinayon, moulbo na usab ang giyera didto sa Mindanao ug lisod na kaayo nga mabalik pa ang pagsalig sa gobiyerno.

Ang Malacañang  ug MILF  maoy moaprubar sa BBL una pa kini ibalik ngadto sa Kongreso aron mahingpit na nga usa ka balaod.

Kung nag-apas ang mga batos ni Aquino nga maapil ang pagpasar sa BBL  sa State of the Nation Address karong Hulyo 28, kinahanglan sigurohon nga makasalig  niini ang tanang  habig.