Unsaon pag-transfer sa titulo sa napalit nga yuta

Dear Atty. Divine,

Duna koy pangutana may labot sa napalit nako nga yuta. Niadto pa kining miaging tuig nako napalit ug ang akong gikuptan mao lang ang Deed of Absolute Sale nga pinirmahan sa tag-iya ug notarized na. Ang Tax Declaration ug Titulo sa maong property nakapangalan pa sa tag-iya ug wala pa mabalhin sa akong pangalan. Gusto unta nako nga ibalhin na sa akong pangalan ang titulo aron akong mabuhisan. Unsa may angayan nako nga buhaton. Salamat daan sa imong paggiya kanako. - Mayen

Dear Mayen,

Ang una nimong buhaton mao ang pagbayad sa Capital Gain Tax ug Documentary Stamp Tax ngadto sa BIR diin mahimutang ang imong yuta. Ang imong mabayran sa BIR niana 7.5% sa purchase price or zonal value depende kun unsay mas dako kanila. Sa imong pagbayad sa buhis magdala ka og Certified True Copy sa Tax declaration, Tax Clearance, Certified True Copy sa Title ug ang Deed of Absolute Sale. Gawas sa maong dokumento aduna pay laing rekisitos nga ipasumiter unya sa BIR. Human sa imong pagbayad sa buhis, mogawas ang Certificate Authorizing Registration kon CAR ug mao kana ang imong isumiter sa Assessor’s Office aron pagbalhin sa Tax declaration ngadto sa imong pangalan human sa imo ‘sab nga pagbayad og transfer tax kanila. Human niini, adto na usab nimo iduso ang maong dokumento sa Register of Deeds aron sa pagbalhin sa Titulo ug ang original nga Title kinahanglan nga imong ilakip sa pagsumiter ngadto kanila aron ilang ma-process ang bag-o nga titulo ubos na sa imong pangalan. Hinaot nga akong natubag ang imong mga pangutana. Thanks and God Bless. - Atty. Divine

Alang sa inyong pangutana, ipadala lang sa Legal Corner sa Banat News sa V. Gullas Street, Cebu City or email sa [email protected] ug akong tubagon ang inyong pangutana matag  Miyerkules ug Domingo pinaagi sa akong column.