Presidential survey

Layo pa man gyud ang 2016, apan, mora na’g duol. Gani, mibati na kita’g kabalaka kinsay mopuli ni Noynoy … tingali unya og dili ipadayon ang mga pagtaral ngadto sa hukmanan sa mga nalambigit sa kahugawan sa pang-gobiyerno.

Ang uban sad, naglaraw nga inigkapupos sa term ni Noynoy, ila kunong pasakaan og sumbong gumikan sa mga kalapasan nga nahimo.

Unya, atong makita nga medyo busy na’g gamay si Vice President Binay, pangandam sa 2016 nga bugnong lugaynon. Daghan nang mga ngalan ang milutaw nga mamahimo niyang runningmate,  kay sa pagkakaron ra ba, wala pay klaro kinsa’y sabakon ni Noynoy nga ma-standard bearer sa Liberal Party.

Ang tanan pulos mga speculation, gawas ni Binay nga dugay nang nagpahibawo sa iyang tinguha paglingkod sa Malacañang.

Ang Pulse Asia, isip usa ka malambuong negosyo, mipahigayon og survey sa miaging Marso ning tuiga, diin, maoy nag-una si Binay. Dako kaayo og labaw, 40% gud ug ang sunod, 15% kang  Poe, ang uban layo na kaayo. Nangiwit sila si Revilla ug Lacson. Sa napulo ka ngalan, ika-unom si Marcos. Ambot nganong  nakasulod man si Kris Aquino, ika-upat.

Anyway, atong ma-imagine ang dakung ngisi ni Binay. Apan, kinsay  mga respondents sa maong survey? Nahibong ta kay dili pa dugay, duha ka radio station dinhi sa Cebu City, nag-conduct og survey by phone, ang pangutana: Kun mag-eleksyon ron, kinsa may inyong botohan pagka-Presidente? Walay ngalan.

Nakalimot ko kinsay nag-una, basta kay ang akong hinumdoman, wala manimaho sila si Binay ug Roxas, nagpasabot nga lahi ang sentimento natong mga probinsiyano kay kanila didto sa kaulohan. Mao nga nangutana ta kun kinsa’y gi-survey sa Pulse Asia? Mao nga dili maayong mo-kompiyansa si Binay.

* * *

Mora’g mahinayon gyud og balhin si Lapu-Lapu ngadto sa Opon gikan sa Luneta. Di gyud molunga si Mayor Paz Radaza. Kay alang niya, di kinahanglan nga adto magbuntaog ang bantayog ni Lapu-Lapu didto sa kaulohan.

Apan, ngano man gyud nga ato mang hilabtan si Lapu-Lapu didto sa Luneta kauban ni Jose Rizal? Dako kaayo ni’g exposure alang sa atong bayani dinhi. Sa ato nang gibalikbalik pagpangutana, kun maghisgot ta’g tourism, kinsa man nga mga langyaw ang motuyo gyud pag-adto sa Punta Engaño aron pagtan-aw ni Lapu-Lapu?

Di ba mahimo Mayor, nga ato lang tong pasagdan si Lapu-Lapu didto, wala man tingali to siya hinginli didto, unya maghimo ta’g daghan kaayong monumento ni Lapu-Lapu, atong ilibot sa tibuok isla sa Mactan?

* * *

Tan-aw nako, bisa’g di ko traffic expert, mora’g ang no-left-turn scheme ni Mayor Mike sa Ban-Tal road, di gyud mosalir. Samot ang kalibog ug kahasol sa mga motorista.

Wala ni immediate nga solution. Ang unang buhaton mao ang pag-clear sa sidewalk, ug di ni madali ug di masayon, kay daghan ang maapiktahan. Unya, istriktuhon gyud ang pagpatuman sa mga balaud sa trapiko. Usahay gud, lax kaayo ang pagpatuman niini, mao nga moyanoyano la’g violate ang mga driver. Di ba, ‘tom?