EDITORYAL - Party sa prisohan

Mipadangat og petisyon o panawagan ang mga detainees sa PNP Custodial Center nga ipabalhin og laing selda ang duha ka  gikostudiyang sila si Senador Jose “Jinggoy” Estrada ug Senador Ramon “Bong” Revilla Jr. tungod kay disturbo sila sa kalinaw sa maong pasilidad.

Gani pwerteng banhaa na karon sa planong pagpa-imbestigar sa warden sa maong pasilidad nga si Superintendent Mario Malana gumikan kuno sa paghatag og special treatment ngadto sa duha ka senador.

Tinuod di sila ordinaryong mga detainees. Ordinaryo ba pud diay nga detainees nga ibutang sa usa ka espesyal nga detention center sa PNP? Nagpasabot parehas lang silang tanan. Silang tanan wala pa mahukmi sa mga talagsaong mga kaso nga ilang giatubang.

Apan nganong duna may espesyal nga pag-atiman sa duha, kay senador  sila? Simple ra man unta kini nga problema kung girespeto lang sa mga nagdumala sa maong prisohan ug sa mismong mga kabanay sa duha ka senador ang visiting hours nga alas-9 sa buntag hangtud sa alas-3 sa hapon.

Dili pud siguro morisgo si Malana kun wa pa kini pagtugot sa mas labaw pa kaniya. Kini nga imbestigasyon batok niya mahulog lang sa wala kun dunay mas labaw pa niya nga maoy naghatag og “go signal” nga magpa-party sila atol sa anibersaryo sa kasal ni Estrada nga nagbinuntagay.

Husto ang media sa pag-report bahin niini, tungod kay nasakpan nga duna gihapoy mga palusot bisan pa man sa dili ordinaryong mga kaso. Pinaagi niini nakita  nga kining maong mga senador tataw kaayo nga wala say konsiderasyon sa uban tungod kay duna sila’y impluwensiya.

Dili solusyon ang pagtaktak kang Malana o pagbalhin sa duha, kun dili ang pagpatuman lang gyud sa hustong polisiya nga gitakda sa pagpadagan sa maong pasilidad.