Mag-ilis ko og numero sa mosunod nga mga adlaw. Gikan sa Globe mobalhin na ko sa ABS-CBN Mobile. Nabalaka ang kauban nakong mga kawani sa kalisod sa pagpahibawo sa tanan nilang contacts sa bag-o nilang numero. Nahadlok nang daan nga may pipila gyong di mapahibawo ug busa mahasol ang ilang komunikasyon.
Pasayloa, apan wa ko’y problema. Inig-taod sa bag-o nakong SIM, magpabilin ang tanan nakong contacts. Way bisan usa nga mawani. Lahi sa nangaging katuigan nga kinahanglan pang ibalhin ang contacts sa SIM card o kinamuton gyud og kopya una mabalhin sa mobile phone, karon mahimo na lang piyongan. Daghang salamat sa pagbugkos sa tanang Google apps sa Android operating system.
* * *
Kun giablihan ang Android phone ginamit ang imong Google account, wa na kay hago. Ang tanan nimong contacts makarga na sa imong GMail, Drive, Hangouts ug ubang apps. Bisan kapila ka pa mag-ilis og SIM o mobile phone, mapabilin ang tanang contacts sa imong phone book, bisang mga ngan nga ganahan na nimong kalimtan.
Nakaseguro kong gihimo sab ni sa iPhone ug Windows Phone. Hinaot nga sama kasayon. Kay di na angay’ng hatagan og dugangan ang kahasol sa mga nag-ilis og SIM o mobile phone. Mas maayo gyud unta kun mapatuman ang gihimo sa ubang kanasuran nga mapabilin ang imong numero bisan unsa nga kompaniya sa telepono ang imong kontratahon.
* * *
May bag-o pa gyud kong nabantayan: Kun wa kang kahibawo sa numero sa buhatan sa gobiyerno o pribadong kompaniya, di ka kinahanglang magkarakara pagpangutana ni bisan kinsa. Ang Google moapil sa ilang search results sa mga numero sa telepono, gani may icon na sa telepono nga igo na lang nimong tuplukon.
Mas nakanindot pa gyud mao nga ang numero nga ilang gihatag ug imong gitawgan mahimo nang kabahin sa imong phone book nga way dugang kutikuti sa imong bahin. Ug busa sayon na lang pangitaon ug tawgon sa sunod higayon bisan kun wa na kay internet access.
* * *
May lain pa gyud kong nahibaw-an. Gihatagan ko sa numero sa buhatan sa presidente sa Cebu Technological University (CTU) kabahin sa among pangandam sa labing dakong piyesta sa libreng mga pangalagad sa Sugbo. Ang Grand Halad sa Kapamilya karong Sabado, Hunyo 28.
Dihang akong gitawgan ang numero, napatik sa akong mobile phone ang tibuok ngan sa CTU, apil ang ilang website, email address, Google+ account ug street address sa Google Maps. Maong sayon ra ming nagkasulti si Dr. Victor Villaganas, CTU Acting President, ug nagkasabot nga magtagbo sa iyang buhatan karong Lunes. Ug makaseguro kong magpabilin sa akong mobile phone ang tanang numero sa CTU bisan kun SIM na sa ABS-CBN Mobile ang akong gamiton sa weekend.
* * *