Peligro sa sensiyo

Usa ako sa mibahakhak pagkadungog namo sa balita sa nakalabay nga adlaw nga gihingusgan na karon sa otoridad ang kampanya batok niadtong nagtiner og daghan mga sensiyo.   Alang kanatong mga yanong lungsoranon, mora’g dili katuohan ang maong balita. Apan mismong ang hepe sa Bangko Sentral ng Pilipinas ang mikonpirma nga adunay balaud mahitungod  niini.

Matud pa niya nga ang pagtipig og daghang sensiyo matawag og hoarding ug dakong kalapasan sa balaud. Mao nang nanawagan ang BSP nga kadtong nagtipig og daghan sensiyo kinahanglan ila na kining i-dispose.

Karon nga kalapasan sa balaud diay ang magtiner og mga coins, wala na gyud diay tay dag-anan. So kadtong adunay nagtipun-og nga mga sensiyo diha, hinay-hinaya na ninyo kini og dispatsar aron dili kamo madiskwedo.

Apan kun ilegal ang magtago og mga sensiyo, mas dakong kalapasan sa balaud ang magtago og milyones ka pesos nga binultong papel, ilabi na kun gikan kini sa ilegal nga paagi.  Klarong money laundering na kana. 

Hinuon ambot kun unsa ka lig-on ang ngipon sa balaud nga nagdili pagtiner og daghang sensiyo. Wala pa kita nakadungog nga adunay gitaral sa hukmanan ug napriso gumikan sa pagtago og sinakong sensiyo.

Bisan pa gani kadtong nagtago og binultong papel nga salapi nga gikan sa ilegal nga binuhatan mora’g wala pa kita makadungog nga adunay nagtingkagol karon. Ug kun aduna man gani, mga gagmay lamang sila nga isda.  

Nahinumdom na hinuon ko niining dakong isyu sa P10 bilyones nga pork barrel scam nga gikalambigitan sa pipila ka magbabalaod sa Senado ug Ubos Balay Balauranan karon. 

Sa kadaghan sa giingong nalambigit sa pork barrel scam, tulo pa lamang ang gikiha didto sa Sandiganbayan tungod sa giingong pag-um-om nila sa salapi sa katawhan. Dinhi atong makita ang kahinay gayud sa dagan sa ligid sa hustisya sa nasud. Kun andam ang otoridad paggukod niadtong naglubong og mga sensiyo, mas maayong unahon nila paghingusog ang kampanya batok niadtong nalambigit pagsakiyo sa bilyones nga kantidad sa salapi gikan sa kaban sa lungsod.