Cash assistance sa solo parents

Maayong duklon kining mga senador nga miawhag og “fair trial” alang nilang Senador Juan Ponce Enrile, Jinggoy Estrada ug Bong Revilla.

 Ang “just, fair and speedy trial” usa ka batakang katungod sa usa ka tawo nga giakusahan nga nakabuhat og krimen. Sa ato pa, kining fair trial angay kining ihatag sa tanang akusado, dili lang alang nilang Enrile, Jinggoy ug Bong.

Mao kini sakit dinhi sa Pilipinas, kun mga politiko o mga adunahan na gani ang mosinggit og makiangayon nga dagan sa kaso, dali kaayong makalingi ang korte ug mohatag dayon. Apan kun pordoy na gani ang mangayo niini, maayo lang og sa napulo ka kaso adunay usa nga tagdon ni Señor Huwes.

Kun tagdon sa Korte Suprema ang awhag ni Ombudsman Conchita Carpio-Morales nga buhatan sa Sandiganbayan og special division aron maoy maminaw sa kaso sa tulo ka senador, mga kongresista ug ni Janet Lim-Napoles nga giakusahan nga nangawat sa P10 bilyones nga Priority Development Assistance Fund, maayong tagdon usab niini ang singgit sa mga tawo nga nangapriso bisan sa kawalay ebidensiya sa ilang mga kaso o nangapriso tungod sa pasangil nga walay basehan.

* * *

Samtang magpabilin akong baruganan batok sa cash assistance alang sa mga single parents tungod sa akong nakitang dautang epekto niini una, sa atong panudlanan nga moresulta sa pagkibra sa pundo alang sa mas importanteng programa sa dakbayan sa Sugbo, akong seguroon nga magpabilin akong respeto ni Konsehal Gerry Carillo nga naninguha niining maong local social legislation alang sa mga batan-on nga sayong naka-anak.

Si Carillo diay ang chairman sa Committee on Social Services sa konseho sa dakbayan, busa dili siya makalikay sa pagsang-at og mga ordinansahon nga maghatag og social services sa mga residente sa siyudad.

Angay usab ko mangayo og pasaylo kaniya nga sa akong pagkomentaryo sa ordinansahon alang sa cash assistance sa mga single parents, akong nahisgotan ang iyang kaso kaniadto niadtong batan-on nga giingon nahapakan niya og bato sa usa sa mga imnanan.

Apan akong tambag kang Carillo palapdan una ang pagtuon kun angay ba kining maong klase sa tabang ngadto sa mga batan-on nga sayong nadisgrasya kay hadlok kong matawag na kita og “dole-out capital” sa Kabisay-an, ug dili ko gusto nga ang Cebu City Hall mahimo nang tighatag og sustento sa mga angkan nga wala na tagda sa nakapaanak.