Ang center-island sa Osmeña Boulevard ug Natalio Bacalso Avenue sigurado nga kuhaon kun sugdan na ang pag-ugmad sa proyekto alang sa Bus Rapid Transit dinhi sa dakbayan sa Sugbo. Wala hinuon kaayo mabalaka niini si Mayor Michael Rama tungod kay ang center-island nga gipahimutang karon sa mao nga mga karsada wala man kana diha sa karaan’g Sugbo.
Nahinumdom ko diha’ng bata pa ako kaniadto nga isuroy ko ni Papa dinhi sa dakbayan nga kadto’ng gagmay nga sakyanan nga gitawag og PU, makahimo man gani sa pagliko balik diha sa Osmeña Boulevard atubangan sa Cebu Doctors Hospital. Minus pa kaayo ang mga PUJ kaniadto ug wala pa’y center-island diha sa mao nga karsada. Sa press conference namo sa City Hall kagahapon, gipakita kami ni Mayor Rama sa karaan nga hulagway sa Osmeña Boulevard.
Tinuod g’yud, lapad pa kaayo sud-ungon ang Osmeña Boulevard kaniadto, ang karsada gikan sa Fuente Osmeña hangtod sa Kapitolyo. Ang karsada gikan sa Fuente Osmeña paingon diri sa Sanciangko gitawag og Jones Avenue, ug ang gikan sa Sanciangko lahos na sa Plaza Independencia, gitawag og Juan Luna.
Karon sa bag-ong panahon, ang karsada nga gikan sa Kapitolyo lahos na sa Plaza Independencia gitawag na og Osmeña Boulevard pasidungog ni Don Sergio Osmeña Sr. nga nahimo’ng presidente sa nasud.
Balikan nato ang pagkuha sa center-island sa karsada, walay problema kay wala man ‘say gamit ang center islands gawas lang sa pagpaanindot sa dakbayan.
Mag-unsa man ang kanindot kun gubot ang atong kadalanan tungod sa mga sakyanan nga mag-ilogay og lusot tungod sa kahuot. Kun anaa na tingali ang BRT, lauman nato nga makasulbad kini sa problema sa trapiko.
Kun ako lang hinuon ang pahukmon, dili na nako tugotan nga makadagan ang mga dunot na kaayo nga sakyanan. Walay problema nga daan ang modelo sa sakyanan basta tinagad lang, dili dunot.
Daghan man gud karon nga mga sakyanan, ilabi na ang gigamit nga pasaheroan nga pwerte g’yud tawon ka gubaon. Ang mga tag-iya niini nga mga sakyanan nagsigi lang og kumkom sa kita sa ilang sakyanan nga wala mopaayo.
Abi ninyo og nganong naingon niini ang sitwasyon? Wala may enforcement arm ang Land Transportation Franchising and Regulatory Board (LTBRB) ug Land Transportation Office (LTO) nga mohimo’g kampanya sa mga “running coffins.â€