Taytayan sa pagtinabangay

 Tabunan, Borbon, Cebu--Mahimo unta nga ang Hoya Corporation, nga may unom ka pabrika sa Pilipinas ug mga sanga sa 20 ka nasud, mopili og laing dapit nga tabangan ug laing kahugpongan nga ikaabag. Apan gipili nila ang amihanang Sugbo ug ang Kapamilya Relief Campaign sa ABS-CBN Central Visayas.

Mahimo unta nga ang ABS-CBN Foundation, nga nag-atiman sa mga biktima di lang sa nagsunod nga linog ug bagyo sa Kabisay-an kun dili apil na sa mga biktima sa bagyo ug baha sa Mindanao ug Luzon, mobalibad nga may mas dinalian nga mga proyekto. Apan gidawat niya ang tanyag sa Hoya pagtukod og mga eskuylahan sa amihanang Sugbo.

* * *

Mahimo unta nga laing lungsod ang among pilion tungod sa kalapad sa kadaot ug sa kadaghan sa tabanganan. Mahimo unta nga ang Armadong Kusog sa Pilipinas, nga among kaabag sa pagtukod og mga eskuylahan sa Negros Oriental ug ubang bahin sa nasud, mobalibad nga may nag-ung-ong sab silang mga proyekto uban sa ubang non-government organizations (NGOs).

Apan gitultolan ang among kaubanan dinhi atol sa ilang pakisusi sa labing haom nga luna nga tukoran og eskuylahan. Ug wa mobalibad ang Central Command ug 53rd Engineering Brigade, nga pulos nagbase sa Kampo Lapu-Lapu sa Dakbayan sa Sugbo, sa pagsanong sa dinaliang proyekto.

* * *

Maong ubos sa naglingiting nga kainit sa adlaw, taliwa ning naggusbat nga gym sa Tabunan National High School, nag-abot ang tanang nahilambigit sa proyekto aron pagkubkob sa unang lungag sa luna nga tukoran sa usa ka andana nga school building nga may duha ka classrooms:

Silang Mayor Butch Sepulveda sa Borbon, Heneral Romeo Labador sa CentCom, Koronel Arnold Depakakibo sa 53rd Engineering Brigade sa Philippine Army, Presidente Maeda sa Hoya Philippines Optical Instruments (HPOI), ABS-CBN Cebu Station Manager ug Visayas Cluster Head Tata Cinco-Sy ug ang kadagkoan sa Department of Education (DepEd) nga gipangulohan ni Dr. Hermogena Miranda.

* * *

Tanang sangkap sa tukuron nga eskuylahan komprahon sa Hoya ug ABS-CBN Foundation ug ang konstruksiyon dumalahon sa mga inhinyero sa Armadong Kusog inabagan sa boluntaryong mga panday sa Tabunan ug Borbon. Silang Mayor Sepulveda ug Kapitan Dotillos sa Tabunan nipasalig pagtabang sa uban pang panginahanglan. Gipaabot nga madugangan pa ang dul-an sa 600 ka tinun-an dinhi nga naggikan di lang sa Borbon kun dili hasta na sa silingang lungsod sa Tabogon.

Tungod sa tampo sa Armadong Kusog ug mga boluntaryo, may mahibilin pa sa donasyon sa Hoya ngadto sa ABS-CBN alang sa dugang mga eskuylahan. Nisugyot ang Hoya nga ang sunod nga eskuylahan tukuron sa Consolacion nga, bisan wa maigo ni Yolanda, maoy pinuy-anan sa kasagaran sa ilang mga kawani. Malipayon mi nga sa makausa pa nahimo na sang taytayan sa pagtinabangay. [email protected]