Guwardiya pabayron sa mangawala sa gibantayan nga grocery

Dear Atty. Divine,

Maayong adlaw atorni. Security guard ako sa usa sa mga ilado nga tindahan dinhi sa Sugbo. Ang among problema ug sa akong mga kauban mao ang pag-charge namo’ng mga guard sa taga grocery department sa actual amount of loss or damage sa mga item/s nga sila ra ang nasayod kung unsa ang ilang gustong i-charge sa amoa. Karon gusto kami mopasaka og reklamo sa DOLE kay nakakuha naman kami og mga ebidensya batok kanila aron ma-recover namo ang kantidad nga na deduct na sa amoa. Matud pa sa among agency, sila mismo wa masayod kung unsa ang mga items nga gi-charge sa amoa kay automatic naman naka-deduct sa payroll  gikan sa among gibantayan. Palihug tambagi ko atorni kun unsay mga posibleng lakang nga among buhaton. – Noel

Dear Noel,

Kun ang Labor Code ang basehan, ang mga kompaniya or employer mamahimo lang nga mo-deduct sa sweldo sa ilang mga kawani sa mga mandatory contributions sama sa SSS, PhilHealth, buhis ug PAGIBIG. Kanang ilang i-deduct sa inyong sweldo nga mga butang nga nawala or na-damage sa grocery posible nga ang ilang gibasehan niana mao ang inyo’ng kontrata kay dili man mamahimo nga ila nang i-deduct sa inyo’ng sweldo nga way pagtugot kaninyo’ng mga gwardiya. Ang maayo ninyo nga buhaton karon mao ang pagsusi kun aduna ba kamo’y kontrata nga gibasihan may labot sa ilang pag-deduct sa inyo’ng sweldo sa kantidad sa mga nangawala ug na-damage sa grocery department, sa dili pa kamo moadto sa DOLE. Mas maayo usab nga ang inyong HR Department mismo ang pangayoan ninyo og katin-awan niini ug kun unsay ilang gibasehan sa pag-deduct ug ngano’ng miabot sa maong kantidad. Human niini, kun wa gihapo’y katin-awan mas maayo nga inyo kanang ireklamo sa DOLE aron ilang ma-imbestigar ang maong issue. Mamahimo usab nga modiretso kamo og reklamo sa DOLE kun aduna na kamo’y mga ebidensya nga maipakita kanila pagmatuod sa inyong pasangil. Daghang Salamat and God Bless. — Atty. Divine

Alang sa inyong pangutana ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules ug Domingo.