Impiyernong trapiko sa San Roque-Laray

Ang Cebu South Coastal Road nahimo nang naandan nga agi-anan sa mga Sugboanon nga mamauli sa habagatang mga lungsod lapas sa dakbayan sa Talisay.

Nakatabang kini sa pagpaluag-luag (kay dili man gyud ingon ka-luag) sa Natalio Bacalso Avenue diin anha mag-agian ang mga PUJ ug PUB paingon ug gikan sa habagatang kalungsoran. Gikan sa South Road Properties paingon sa dakbayan sa Talisay nga moagi sa Cebu South Coastal Road ang labing sayon alang sa mga motorista, ilabi panahon sa sayong kagabhion nga nag-apas nga dili mapasmo ug makaapil sa panihapon uban sa pamilya.

Apan sa dugaydugay na nakong agi sa Cebu South Coastal Road, daw wala panumbalinga sa hingtungdan nga mga opisyal ang kahimtang sa mga motorist nga karon mangatanggong og dugay tungod sa “impiyerno nga trapiko” nga magsugod sa dili pa molabang sa taytayan sa San Roque agi sa fishport nga wala magamit lahos na sa crossing sa Laray, Inayawan - San Roque, Talisay.

Ambot og wala lang kaha maghikutar si Mayor Johnny delos Reyes niini tungod kay dili man tanang motorista nga magpangusmo ug makapamalikas sa kahinay sa trapiko sa maong lugar taga-Talisay.

Dugay nang gireklamo sa mga motorista ang maong suliran pinaagi sa social media. Apil ko sa nagyawyaw niini sukad niadtong gibuksan kanang Gaisano SRP sa eskina Laray. Akong na-obserbahan nga mas gihatagan og importansiya sa City of Talisay - Traffic Operation and Development Authority (CT-TODA) ang gatusan ka mga traysikad nga makalabang sa Laray-San Roque crossing, bahala na og malangay ang mga motorista paingon sa south.

Sa akong obserbasyon, usa ka minuto ang gihatag nga gutlo alang sa mga sakyanan paingon sa south, ug mao usab ang molabang sa crossing gikan ug padulong sa Gaisano. Maglagot ko nga magtan-aw nga bisan hawan na kaayo ang karsada, ang signal light iya gihapon sa crossing gikan ug padulong sa Talisay.

Unya ang nangagi mga traysikad!

Mayor delos Reyes, unsang balaora ang nagtugot sa mga traysikad diha sa mga dakong karsada sama sa Cebu South Coastal Road? Usahay ra ba mosugat (counterflow) sa atong agianan ning, wala pa gyuy suga sa gabii.

Makapaabot ba kaha kita og aksiyon ni Mayor delos Reyes nga mga botante ra ba kining mga drayber ug tag-iya og mga traysikad?