EDITORYAL - Diskwento sa pletehan
Ang paghatag og 20 porsiyento nga diskwento sa pletehan sa mga estudyante atol sa tingklase dugay na kaayo nga gimando sa Land Transportation Franchising and Regulatory Board (LTFRB).
Apan wala malilong kanato nga daghan kaayo’ng drayber og public utility vehicles (PUV’s) nga mibaliwala ra niini’ng kamandoan sa LTFRB tungod kay ang mga hingtungdang tinun-an dili man moreklamo.
Kay P7.50 man ang minimum nga pletehan dinhi sa Sugbo alang sa una nga lima ka kilometro nga pagsakay og passenger jeepney, nagpasabot nga P6 ra g’yud ang plete sa usa ka tinun-an. Ang P1.50 nga madaginot sa usa ka tinun-an sa pagsakay niya og PUJ daku na kaayo og matabang nga madugangan ang iyang bawon sa pagtungha.
Giangkon sa kadagkoan sa LTFRB nga wala sila’y mahimo batok sa mga drayber nga dili mohatag og diskwento sa pletehan sa mga tinun-an kun wala’y mopadangat kanila og pormal nga reklamo.
Angay gayud unta nga suwayan kun may ngipon ba ang LTFRB nga mopahamtang og silot sa mga drayber nga dili motuman sa balaod. Kun may kaisog lang g’yud unta ang mga hingtungdan nga tinun-an, sigurado nga mahadlok na ang mga drayber ug ang ilang konduktor sa pag-abuso.
Mga tinun-an kinahanglan hinuon nga aron sila mailhan magsul-ob gayud sila og uniporme sa tunghaan nga ilang gieskuylahan ug labaw sa tanan itaod nila ang ilang mga identification cards.
- Latest
