EDITORYAL - Kumusta na ang gikumot ni Yolanda

Sa sunod nga buwan mosulod na usab ang panahon sa ting-uwan bisan pa og adunay El Niño, dungan niini ang pagsugod og abot-abot sa mga bagyo gikan sa dagat Pasipiko. Ang Pilipinas maagian og dili momenus 20 ka bagyo kada tuig.

Unom na ka buwan ang milabay apan hangtud karon wala pa gihapon makahunat ang gisaad sa gobiyerno nga rehabilitasyon sa mga dapit nga gikusokuso sa bagyong Yolanda sa Eastern Visayas ug bisan sa Northern Cebu. Dunay rehabilitasyon apan hinay pa sa suso ang pag-abante.

Si rehabilitation czar Panfilo “Ping” Lacson mibutyag sa usa ka interbyu kaniya sa sikat nga CNN international correspondent Andrew Stevens sa report sa The Philippine Star, nagplano ang gobiyerno pagtukod og 214,000 ka  bag-ong balay alang sa mga naapektohan sa bagyo.

Apan hangtud karon 130 pa lang gihapon ang nahuman. Nagpasabot kini nga mag-antos pa gyud og daghan pang umaabot nga mga bagyo karong tuiga ang mga biktima una pa nila madawat ang gisaad nga kabalayan.

Tungod sa kalangan sa rehabilitasyon namalik pagtukod ang mga biktima sa ilang mga balay sa danger zones daplin sa dagat bisan dunay gipatumang 40-meter easement no-build zones gikan sa baybayon.

Karon nga nagkagrabe ang Climate Change, kining mga tawong namalik sa mga danger zones  maisip silang mga “waiting victims” sa umaabot pang mga bagyo. Kinahanglan pa ba nga mausban og susamang trahedya una pa motatak sa alimpatakan sa mga tawo ang leksyon sa Yolanda?

Apan unsa may mahimo nila kun ang mismong gobiyerno mas daghan ang saad apan wa sa lihok? Di man mahimo nga mohunong sila sa normal nga kinabuhi samtang nagpaabot sa wala pay kasigurohang saad sa gobiyerno.