Panamilit ni Pawix
Wa na si Pawix, ang unang nipakita nako sa kalapad ug kamabulukon sa internet. Namatay si Pawix sayo karong buwana human na-aksidente sa Estados Unidos. Wa kong katambong sa iyang haya sa dakong punerarya sa Mandaue nga maoy gidad-an sa abo sa iyang patay’ng lawas. Wa sab kong kahatod niya sa lubnganan.
Di mi suod si Pawix. Di gani akoy iyang gitudloan unsaon pagsud sa internet pinaagi sa personal computer. Akong higala ang iyang kaila. Akong hinigugma ang iyang gitudloan. Akong asawa ang usa sa labing nagbangotan sa pagtaliwan ni Pawix. Apan dakong haw-ang ang namugna sa akong dughan sa iyang pagbiya. Kay siya ang labing unang nakapalili nako sa talagsaong kalibotan nga atong gipuy-an karon.
* * *
1997. Wa koy PC. Apan gitudloan kong Iris, nga karon ako nang asawa, unsaon pag-email, pag-chat ug pagduwa sa PC sa iyang karaang klinika. Di sama kasayon karon ang pagsud sa internet 17 ka tuig ang nilabay. Apan suhito si Iris tungod ni Pawix. Napiskan ra ko sa dako niyang bintaha.
Linya sa telepono ang agian sa internet access sa Sugbo niadto. Kay kada minuto man ang bayran, gitudloan ni Pawix si Iris og sekreto: Kadiyot rang mag-online pag-download sa tanang emails, gibasa ug gitubag ang tanang emails samtang offline, dayon balik og online kadiyot aron mapada ang tanang naglumbay nga emails.
* * *
Kay di man tihik si Iris sama nako, nakakita siya og daghang higala sa ubang bahin sa kalibotan pinaagi sa ICQ, karaang instant messaging computer program, sa wa pa mauso ang Yahoo Messenger, Google Talk ug Facebook.
Labing nakapalingaw nako maong mga duwa. Mokalit lang og tingog sa PC si Pawix pagpanghagad og online checkers, dayon nanungog samtang pildehunon na mi sa duwa. Sa mga higayon nga nireklamo si Iris nga depektuso ang iyang PC, kalit lang nga nanglihok ang apps sa iyang desktop kay giayo na diay ni Pawix bisan nakalarga na sa US.
* * *
Minyo na ming Iris dihang nakakita kong Pawix. Nibakasyon og kadiyot sa iyang trabaho sa US, diin nabisto nga hadlokang mokatkat sa poste, napugos pagpakita sa iyang abilidad ug nahimo dayong superbisor. Mas sayon nang internet access ug nisulbong nang smart phones, apan si Pawix gihapon ang nakatubag sa tanan namong kalibog.
May nakasulti ni Iris sayo karong buwana nga patay na si Pawix, gi-cremate ang patay’ng lawas ug naabot na sa Sugbo ang abo. Si Iris ang usa sa labing nidanguyngoy sa unang mga adlaw sa iyang haya. Nga wa na makaako sa pagkuyog sa adlaw sa iyang lubong. Namatay si Pawix nga nagduma na og iyang kaugalingong IT company sa US. Paolo Alessandro Ignacio ang tibuok niyang ngan. Panamilit, Pawix.
- Latest
