Sayop ba ang estatistika?

Sayop kuno ang estatistika mahitungod sa nagsakang krimen dinhi sa dakbayan sa Sugbo. Kini mao ang pamahayag ni Cebu City Police Office director Noli Romana ngadto sa Police Regional Office-7. Gani, matud pang Director Romana, mikunhod kuno ang kaso sa kriminalidad sa dakbayan basi sa iyang pakisusi ug kun aduna man gani pagtaas sa rekord, gamay lamang kuno kini. 

Apan unsay nahitabo nganong sayop man ang rekord sa kapolisan sa ilang pagtali sa mga kaso sa krimen? Nagpasabot ba kini nga dili gayud diay kasaligan ang maong estatistika nga puwede lamang diay manihuon?

Una nang na-report sa media ang pagsaka kuno sa krimen sa dakbayan. Kini basi usab sa mga data nga nakuha sa mga reporter gikan mismo sa kapolisan. Apan dako diay nga sayop ang maong rekord?

Nagpasabot ba kini nga daghan diha sa CCPO ang dili makamao molista sa mga nanghitabong krimen sa dakbayan? Daghan na hinuon ang nagduda niini. Ug hinaut dili media ang pakasad-on sa kapolisan pagtumaw niining sayop nga crime statistics.

Dili lamang ako apan daghang Sugboanon usab ang dili gayud makatuo niining dakong pangangkon sa kapolisan nga mikunhod kuno ang krimen sa dakbayan. Unsa kaha ilang basihan niini?

Dili ba ang giingong nagsakang krimen maoy hinungdan sa lahugay nga gipatuman sa kadagkoan sa CCPO sa pipila ka police station chiefs ning dakbayan? Kini tungod usab sa ubos kuno nga performance niining maong mga estasyonan pagsumpo sa krimen.

Bisan kun unsaon pagpanalipod sa kadagkoan sa CCPO nga kontrolado sa kapolisan ang peace and order, dili nila ikalimod nga naghitak gihapon ang pagpatay, pagpangawat, pagpanglabni ug uban pang krimen sa dakbayan, ilabina sa downtown area. 

Gani sa kadako niining maong problema, daghang turista ang nagpanagana na nga mosuroy sa Colon. Kini tungod sa kahadlok nga basin matiklo sila sa mga nagpahiping hold-aper ug esnatser. Dako kini nga sagpa sa kampanya pagmintenar sa kahusay ug kalinaw. Kini pun-an pa sa panghambog sa kadagkoan sa CCPO nga sayop kuno ang estatistika sa nagsakang krimen sa dakbayan.